Ushaq Astanaǵa apatty jaǵdaıda qondy

О́tken jeksenbi, 27 naýryz kúni tańerteń Astana aeroportynda tótenshe jaǵdaı oryn aldy. Qyzylordadan ushyp kelgen Bek Air avıakompanııasy Fokker 100 ushaǵynyń aldyńǵy shassıleri elorda áýe alańyna qoný kezinde shyqpaı qaldy. Osyǵan baılanysty ekıpajǵa táýekelge bel býyp, laınerdi aldyńǵy dońǵalaqtarsyz qondyrýǵa týra keldi. Bort komandıri apatty jaǵdaıda jerge qoný jóninde sheshim qabyldaǵanǵa deıin áýe kemesi aeroporttyń ústinde 40-45 mınýttaı ýaqyt ushyp júrdi. Osy eki ortada jerdegi qyzmet túrleri mashınanyń jerge qonǵan kezinde qyzyp, janyp ketpeýi úshin qoný-ushý alańyn kóbikpen toltyryp úlgerdi. Keıin jergilikti telearnalarǵa bergen suhbaty barysynda ekı­paj komandıri Dmıtrıı Ro­dın óziniń 35 jyldyq ushý tá­jirı­besinde mundaı jaǵdaıdyń birinshi ret kezdesip turǵanyn aıtty. Ol ushaqty qondyrý jónin­de sheshim qabyldaı otyryp, barlyǵyn nusqaýǵa sáıkes jasaýǵa kúsh saldy. Mundaǵy basty mindet negizgi dońǵalaq­tardyń tabandary jerge tıgen kezde «jerge birden qulap ketpes úshin kabınany ustap qalý» bolǵan. Ushaq kóbik tógilip tastalǵan beldeýge qonǵannan keıin 25-30 metrdeı jerdi «tumsyǵymen» súzip óte shyqqan. Avıakompanııa ókilderiniń aıtýlarynsha, áýe laıneri qonar kezinde «barynsha az zaqymǵa ushyraǵan», sonyń arqasynda borttaǵy 116 jolaýshy men 5 ekıpaj múshesiniń eshqaısysy zardap shekpegen. Sodan keıin Astana aeroporty oryn alǵan tótenshe oqıǵaǵa baı­lanysty birneshe saǵat jumy­syn toqtatýǵa májbúr bolyp, avıa­kompanııanyń birqatar reısteri kidirtilgen. Elordanyń áýe alańynda tó­tenshe jaǵdaı oryn alǵany týraly dabyl kóterilgen boıda Investısııalar jáne damý mı­nıstri Áset Isekeshev sonda jetip, sońynan ekıpaj múshelerimen kezdesip, jaǵdaıǵa qanyqty. Ol óziniń sózinde osyndaı qıyn shaqta úreıge boı aldyrmaı, bárin úlken sheberlik pen shydamdylyq deńgeıinde atqaryp shyqqan, sóıtip, áýe kemesin jerge aman-esen qondyrǵan ekıpajdyń erligine joǵary baǵa berdi. Qazir osyndaı úzdik pılotaj úlgisin kórsetip, úlken sheberlik tanytqan ekıpaj múshelerin, ásirese, onyń ko­mandırin memlekettik jáne vedomstvolyq nagradalarǵa usyný jóninde sóz qozǵalyp jatyr. Sonymen birge, bas prokýratýra ushaqtyń apatty jaǵdaıda qonýǵa májbúr bolýyna baılanys­ty qylmystyq is qozǵady. Ol «áýe kóligi qozǵalysy jáne ony paıdalaný qaýipsizdigi erejeleriniń buzylýy» baby boıynsha tekserý jumystaryn júrgizedi. Sondaı-aq, Investısııalar jáne damý mınıstrliginiń arnaıy komıssııasy Bek Air avıakompanııasy ushaǵynyń Astana aeroportyna apatty jaǵdaıda qonýynyń sebepterin anyqtaıtyn bolady. Murat AITQOJA.