100 jasaǵan aktrısa Habıba apaı

Bul kúnderi Almatydaǵy M.Áýezov atyndaǵy Qazaq memlekettik akademııalyq drama teatrynda dástúrli «Teatr kóktemi–2016» festıvali júrip jatyr. Bıylǵy óner dýmany qazaq sahnasynyń kózi tiri kórnekti aktrısasy, Qazaqstannyń eńbek sińirgen artısi Habıba Elebekovanyń 100 jasqa tolýyna arnalǵan. Jyl saıyn Naýryz merekesi jáne 27 naýryz Halyqaralyq teatr kúnine oraılastyrylyp ótkiziletin atalmysh festıval teatrdyń búgingi baǵyt-baǵdaryn anyqtaýǵa, repertýar saıasatyndaǵy ózindik izdenisterin, dramatýrgııa, rejısser, akter óneriniń búgini men erteńin zerdeleýge múmkindik beredi. Bıylǵy festıvalda aldymen Kishi zalda álem teatrlarynda óte kóp jáne ártúrli ınterpretasııamen sahnalanǵan «Medeıa» tragedııasy qoıyldy. Bul Alena Qabdeshovanyń ózindik jumysy bolyp tabylady. Festıvaldyń saltanatty ashylýyn­da teatr dırektory Erlan Bilál sóz tolǵap, mereke resmı túrde KSRO halyq artısi Asanáli Áshimov qoıǵan «Qaza men jaza» spektaklimen bastaldy. Sol sııaqty, festıval baıqaýyna qatysatyn «Aı men Aısha» dramasy men «Qaza men jaza» krımınaldyq dramasy ótken maýsymnyń premeralary bolsa, «Qoshtasqym kelmeıdi» (rej. Ashat Maemırov) men «Almas qylysh» (rej.Alma Kákisheva) 90-shy maýsymnyń kózaıymdary. Qalaı desek te 90-maýsym teatr úshin tolaǵaı tabystarmen bastaldy. Taraz qalasynda atalyp ótken Qazaq handyǵynyń 550 jyldyq merekesinde M.Áýezov teatry «Qıly jol» tarıhı dramasyn usyndy. Tarıhı-patrıottyq taqyryptaǵy bul alańdyq qoıylym elimizdiń sahna óneri tarıhyndaǵy ǵana emes, rýhanı tájirıbesi turǵysynan da asa sátti megajoba. Teatr ujymy Qyr­ǵyzstanda ótken «ARD ORDO» halyqaralyq festıvaline qatysqan «Qas qaǵym» (rej. E.Nursultan) tragedııasymen Bas júlde, Atyraýdaǵy R.Otarbaev atyndaǵy halyqaralyq festıvaldan «Beıbarys sultan» (rej. Iý.Hanıngo-Beknazar) tarıhı dramasymen qatysyp, Bas júlde alyp qaıtqan bolatyn. Festıval kúnderi rejısserler, akterler men kórermender arasynda kezdesý ótkiziledi. Kórmeler uıymdastyrylady. Aınash ESALI, «Egemen Qazaqstan».  ALMATY.