Túrkııa prezıdenti TÚRKSOI-dy qabyldady

22 naýryz kúni Túrkııa Respýblıkasynyń Prezıdenti Redjep Taıyp Erdoǵan Halyqaralyq túrki mádenıetin damytý uıymy TÚRKSOI-dyń delegasııasyn Bestóbe saraıynda qabyldady. Kezdesýge TÚRKSOI Bas hatshysy Dúısen Qaseıinov bastaǵan resmı delegasııa men Ázerbaıjan, Gagaýzııa (Moldova), Qazaqstan, Qyrǵyz Respýblıkasy, Makedonııa, Mońǵolııa, Túrikmenstan syndy elderden kelgen ónerpazdar qatysty. Sonymen qatar, kezdesýde Túrkııa Premer-mınıstriniń orynbasary Tuǵryl Túrkesh, Túrkııanyń Mádenıet mınıstri Mahır Ýnal boldy. Túgel túrki jurtynyń, Ulys­tyń uly kúni – áz-Naýryz mere­kesimen quttyqtaǵan Túrkııa Pre­zı­denti: «Halyqaralyq TÚRKSOI uıymy qurylǵan kún­nen bastap, túrkitildes halyq­tardyń óner men mádenıetin damytýǵa zor úles qosyp keledi. Túrki dúnıesindegi beıbitqatar ómir súrý mádenıetiniń qalyp­tasýynda eleýli orynǵa ıe. Bul uıymnyń álemdik bedeli orasan zor. Sondyqtan, TÚRKSOI-dyń atqaryp otyrǵan jumystaryna mán berip, únemi qoldaý kórsetip otyramyz. Bıylǵy jyly Naýryz meıramyna arnalǵan merekelik sharalardyń joǵary deńgeıde ótetindigine senimdimin. Naýryz – kóktemniń habarshysy. Túrkııa­daǵy bul kún – baýyrlardy jáne týǵan-týysty biriktiretin mereke. Túrkini ǵana emes, búkil adamzatty beıbitshilikke shaqyratyn kún. TÚRKSOI uıymdastyryp otyrǵan merekelik is-sharalary arqyly Naýryzdyń qasıetimen birge beıbit ómirdiń saǵynyshyn nasıhattap keledi. Osylaısha qurlyqtar arasyndaǵy kópirlerdi salyp, dostyq qarym-qatynasty kúsheıtip otyrady. 28 naýryz kúni Birikken Ulttar Uıymynda jáne 1 sáýirde Vashıngton qalasynda ótetin merekelik sharanyń sátti ótetindigine senimim mol. Osyndaı ıgi sharanyń basy-qasynda júrgen TÚRKSOI Bas hatshysyna jáne TÚRKSOI-dyń jumystaryn qoldap otyrǵan barlyq baýyrlary­myzǵa alǵysym sheksiz,» – dep jú­rek­jardy tilegin jetkizdi. TÚRKSOI Bas hatshysy Dúısen Qa­seıinov Túrkııa Prezıdentine al­ǵys bildirip, ıyǵyna shapan japty. Eske sala keteıik, Qazaqstannyń atynan Túrkııanyń 20-dan astam qalalarynda Naýryz meıramyna arnalǵan merekelik sharalarǵa «Sazgen sazy» folklorlyq-etno­grafııalyq ansambli, «Taraz» trıosy, «Tomırıs» halyq bı an­sambliniń bıshileri, «Samrýk» bıshiler toby qatysýda, – dep habarlaıdy Qazaqstannyń TÚRKSOI-daǵy ókili M.Otarbaev. «Egemen-aqparat».