Aýla klýbyndaǵy aýqymdy ister

Jastar saıasatyn júzege asyrýda jergilikti bılik tıimdi sharalar qabyldaýda. Osy oraıda jastardyń bos ýaqytyn uıymdastyrý máselesimen aınalysyp, daryndy óskeleń urpaqtyń áleýetin ashatyn «Aqtóbe jastary» KMK óz jumysyn bas­tady. Oblys ortalyǵyndaǵy aýla klýby Memleket basshysynyń tapsyrmasyn oryndaý maqsatynda qurylǵan bolatyn. Aýla klýbynyń ǵımaratyn «Batys-2» aýdany «Step­noı» turǵyn úı alaby №6 «G» úıiniń qurylysyn salǵan «Sol­lers» JShS memlekettik men­shikke tegin berdi. Klýbtyń aýma­ǵy 450 sharshy metrdi quraı­dy, «QIK» baǵdarlamasymen sa­lynǵan aýla klýby turǵyn úıdiń birinshi qabaty men jertólesinde ornalasqan. Ortalyqta jattyǵý zaly, horeo­grafııa, shahmat, doıby, toǵyzqumalaq, sýret, dombyra úıirmeleri, sondaı-aq, qaladaǵy jastar uıymdary músheleriniń bas qosyp, arnaıy semınar-trenıngter ótkizetin bólmeleri ornalasqan. Ashylý saltanatyna qatysqan oblys ákimi Berdibek Saparbaev árbir óskeleń urpaq jeke qabile­tine jáne kásibı bilimine saı qoǵamymyzda óz ornyn tabýy qajettigin atap ótti. – Bizdiń áleýmettik-ekonomı­kalyq damý jolyndaǵy qarqy­nymyz, jastardyń qoǵamdyq-saıası ómirdegi ustanymyna, olardyń er­teńgi kúnge degen senimi men bel­sendiligine tikeleı baılanys­ty. Memleket basshysy Nursultan Nazarbaev el bolashaǵynyń baıandy bolýy jolynda jastarǵa erekshe senim artyp, jaǵdaıyn jasaýǵa basa nazar aýdarady. Elbasy­nyń jyl saıynǵy joldaý­larynda, mańyzdy strategııalyq qujattarynda basym baǵyttardy jastarmen baılanys­tyrýy osy­nyń aıqyn dáleli, – dedi óńir basshysy. Sonymen qatar, aǵymdaǵy jyly Aqtóbedegi eki turǵyn úı keshe­ninde jastar ortalyǵyn ashý josparlanyp otyr. Atap aıtqanda, «Nur-Aqtóbedegi» klýbqa berilip otyrǵan ǵımaratty beıimdep, jabdyqtaý úshin 34 mıllıon teńge kóleminde qarjy bólindi. №11 shaǵyn aýdanyndaǵy 2 qabatty ǵımaratqa kúrdeli jón­deý jumystaryn júrgizý úshin 65 mıllıon teńge baǵyttalady. Osy jumystardyń nátıjesinde oblys ortalyǵynda taǵy da eki aýla klýbyn ashý kózdelýde. Satybaldy SÁÝIRBAI, «Egemen Qazaqstan». Aqtóbe oblysy.