Ekinshi oıyn teń aıaqtaldy

Seısenbi kúni Tbılısı qalasynda fýtboldan Grýzııa men Qazaqstan ulttyq qurama komandalarynyń arasynda joldastyq kezdesý ótti. Match 1:1 esebimen teń aıaqtaldy. Eki eldiń qurama komandalary osymen tórtinshi ret kezdesti. Olardyń Almatyda ótken 2006 jylǵy álem chempıonatynyń irikteý oıynynda alań ıeleri qarsylasynan 1:2 bolyp utylsa, Tbılısıde ótken qarymta matchta komandalar teń oınady. 2013 jyly ótken taǵy bir kezdesýde Qazaqstan quramasy 1:0 esebimen utty. Endi, mine, qos eldiń ulttyq quramalary kezekti ret kókmaısa alańda kezdesip, sheberlikterin synap kórdi. Esepti kezdesýdi birinshi bolyp qonaqtar ashty. Matchtyń 35-mınýtynda Azat Nurǵalıev Serikjan Mujyqovtyń oń qap­taldan bergen ádemi pasyn utym­dy paıdalanyp, teńbil dopty qarsylastar qaqpasyna dál tú­sirdi. Biraq ulttyq quramanyń qýanyshy uzaqqa barmady. Arada 3 mınýt ótkende Grýzııa oıynshylary esepti teńestirip ketti. Bul dopty alań ıeleriniń jartylaı qorǵaýshysy Tornıke Okrıashvılı soqty. Osydan keıin oıyn odan saıyn qyza tústi. Komandalar matchqa jaqsy daıyndalǵandaryn kórsetip, birinen soń biri qaýipti jaǵdaılar jasap otyrdy. Kez­de­sýde komandalardyń bir emes, birneshe gol soǵýǵa múm­kin­­dik­teri boldy. Alaıda, alań ıe­lerine de otandastarymyzǵa da teńbil dopty torǵa toǵytý buıyr­mady. Match osylaı teń eseppen aıaqtaldy. Sóıtip, 26 naýryz kúni Anta­lııada Ázerbaıjan quramasyn joldastyq kezdesýde 1:0 esebimen utyp qaıtqan jerlesterimiz kelesi oıynyn da joǵary deńgeıde ót­kizdi. Komandany eki kezdesýde de bas jattyqtyrýshynyń min­detin atqarýshy Talǵat Baısý­fınov alańǵa bastap shyqty. Dastan KENJALIN, «Egemen Qazaqstan».