Alatau Invest Capital mashına qurastyrý óndirisin qoldaıdy

Alatau Invest Capital men Qostanaıdaǵy AllurGroup kompanııasy arasynda ınvestısııa tartý jáne strategııalyq seriktestik jónindegi memorandýmǵa qol qoıyldy. Ekijaqty memorandým  jolaýshylar avtomobılderi, jeńil kommersııalyq jáne aýyr júk mashınalary, avtobýstar óndirisin ilgeriletý, Qostanaıda jalpy aýdany 400 gektar bolatyn ındýstrııalyq aımaqty  damytý, ǵylymı-zertteý jáne kons­trýktorlyq baza qurý baǵyt­­­taryna ınvestısııa tartý máse­lelerin qamtıdy. – Biz eń iri qazaqstandyq AllurGroup ınnovasııalyq kompanııasymen Qostanaıdyń ındýs­trııalyq aımaǵy aıasynda av­tokólik óndirisin damytý úshin birlesip jumys isteımiz. Bul  tolyq oryndalatyn mindet. My­saly, SsangYong Nomad markaly avtomobılderdiń otandyq bólikteri búginniń ózinde shamamen 40 paıyzǵa jetti, kommersııalyq modelderde bul deńgeı 50 paıyz bolady. Biz Qazaqstanda óndiriletin qosalqy bólshekterdiń túrin kóbeıtpekpiz, demek, biz­diń elimizde shyǵarylatyn avto­mo­bılderdiń qazaqstandyq bóligin arttyrsaq deımiz, – dedi Alatau Invest Capital-dyń basqarýshy seriktesi Qaırat Satybaldyuly. AllurGroup dırektorlar keńesiniń tóraǵasy Andreı Lavrentevtiń aıtýynsha, kompanııa 2018 jyldan bastap Qostanaıdaǵy ındýstrııalyq aımaq  aıasynda, sonyń ishinde eksportqa shyǵarý úshin jylyna 40 myń avtomobıl qurastyrýdy josparlap otyr. – 2022 jylǵa deıin ónim shyǵarýdyń ortaq kólemi 700 mıllıardtan astam teńgeni quraıdy, onyń ishinde 7 jyldyń ishinde tek eksport kólemi shamamen 418 mıllıard teńge bolady.  Bul  josparlardy iske asyrý úshin 500-den astam jańa bilikti jumys ornyn qurý qajet bolady, al jergilikti óndiris deńgeıi 50 paıyzǵa jetedi, – dedi Andreı Lavrentev. Memorandýmǵa qol qoıý sharasyna qatysqan Qostanaı obly­synyń ákimi Arhımed Muham­betov ınvestısııa tartý jónindegi memorandým zaýyt jumysyna jańa serpin beretinin aıtty. – Indýstrııalandyrý baǵ­dar­lamasy boıynsha oblysta 81 ınvestısııalyq joba júzege asy­rylady, sonyń ishinde 4 joba avtomobıl jasaý isine qatysty. AllurGroup zaýyttary turaqty damyp keledi, olar óndiristi retke keltirip, avtomobıl jasaýdy damytýda ınvestısııa tartyp qana qoımaı, búkil aımaqtyń  damýyna jaǵdaı jasaıdy», – dedi Arhımed Muhambetov. Atalǵan jobalar Keden odaǵy elderinde ǵana emes, halyqaralyq naryqta Qazaqstannyń básekege qabilettiligin arttyrýǵa baǵyt­talǵan. Názıra JÁRIMBETOVA, «Egemen Qazaqstan». QOSTANAI.