Aqmolanyń Arshaly aýdanyna ákim taǵaıyndaldy

AQMOLA. 6 sáýir. Aqmola oblysynyń ákimi Sergeı Kýlagınniń ókimimen, Qazaqstan Respýblıkasy Prezıdenti Ákimshiliginiń kelisimi boıynsha jáne aýdandyq máslıhat depýtattary kelisiminiń negizinde Taıjanov Azamat Aıtbaıuly Arshaly aýdanynyń ákimi bolyp taǵaıyndaldy. Bul týraly egemen.kz tilshisi habarlady. Aýdan aktıvine jańa ákimdi óńir basshysy Sergeı Kýlagın tanystyrdy. «Arshaly aýdany Astanaǵa jaqyn aýdandardyń biri. Munda kóptegen jumystar atqarylýda. Degenmen birqatar memlekettik baǵdarlamalardy oryndaý boıynsha áli de qarqyndy jumys kútilýde. Investısııa tartý, ónerkásip, qurylys salalaryn jandandyrý baǵytyndaǵy josparlardy oryndaý mindeti tur», – dedi oblys ákimi óz sózinde. Sondaı-aq, óńir basshysy jańa ákimniń jumysyna tabys tiledi. Azamat Aıtbaıuly, 1985 jyly týǵan. Bilimi joǵary. Ol Qazaq gýmanıtarlyq-zań ýnıversıtetiniń bakalavrıatyn jáne magıstratýrasyn aıaqtaǵan. Sonymen qatar, «Bolashaq» baǵdarlamasy aıasynda 2010 jyly Japonııada Tokaı ýnıversıtetinen bilim alǵan. Azamat Taıjanov eńbek jolyn 2005 jyly Astanadaǵy «Yqylas K» seriktestiginde menedjeri bolyp bastaǵan. 2007 jylǵy qarashadan bastap 2008 jylǵy tamyz aralyǵynda Qazaqstan Respýblıkasy ekonomıka jáne bıýdjettik josparlaý mınıstrliginde memlekettik ákimshilik laýazymdardy atqardy. 2008 jylǵy qyrkúıekten Qorshaǵan ortany qorǵaý mınıstrliginde ekspert boldy. 2011 jylǵy aqpannan - Qazaqstan Prezıdenti Keńsesiniń keńesshisi. 2013 jylǵy sáýirden bastap Stepnogorsk qalasy ákiminiń orynbasary laýazymynda jumys jasady. 2013 jylǵy maýsymnan osy kúnge deıin Egindikól aýdanynyń ákimi boldy. Baqbergen Amalbek. Derek, sýret: egemen.kz.