Elbasy Nursultan Nazarbaev qatysqan Iаdrolyq qaýipsizdik jónindegi sammıt aıaqtalǵanyna az ǵana ýaqyt ótti. Onyń aıasynda Prezıdent Nursultan Nazarbaev biraz memleket jáne úkimet basshylarymen kezdesý ótkizip, jahandyq qaýipsizdikke qatysty mańyzdy qujattardyń talqylaýlaryna qatysty.
Buǵan qosa, Elbasy AQSh-tyń saıası jáne qoǵam qaıratkerlerimen kezdesip, ol kezdesýler saǵattarǵa sozylǵan qaınaǵan pikirsaıys, oıjarys, izgilikke shaqyrǵan, adamzat balasyna tóngen jahandyq qaýip-qaterdiń bultyn keri ysyratyn jaqsy otyrysqa aınaldy. Osy jerde, Prezıdenttiń baspasóz hatshysy Dáýren Abaevtyń aıtýynsha, kadrdan tys qalǵan mynadaı bir erekshe jaqsy jaıttar da bolǵan.
Sammıt aıasynda Nursultan Nazarbaev AQSh Prezıdenti Barak Obamaǵa syılyq usynǵan. «Esterińizde bolsa, – deıdi Dáýren Abaev, – Elbasy Obamaǵa budan buryn da, ıaǵnı 2012 jyly Seýlde qazaqsha tumar syılaǵan bolatyn. Bul joly Prezıdent sammıt taqyrybymen úndes «Jarylys» atty kartınany tabys etti, dedi.
Kartınanyń avtory da jarylystyń zaryn tartqan ólkeniń ulany Káripbek Kúıikov bolatyn. Semeı ıadrolyq polıgony ornalasqan jerden 100 shaqyrymda ornalasqan Egindibulaq aýylynyń turǵyny, jaryq dúnıege qoly joq kárip bolyp týǵan onyń óz sýretterin qylqalamdy tisimen nemese aıaqtarynyń bashpaıynyń arasyna qystyryp salatynyn aıtyp turyp AQSh Prezıdentine tabystaǵan Elbasy Káripbektiń búginde Qazaqstan iske qosqan ATOM halyqaralyq jobasynyń qurmetti elshisi ekendiginen habardar etti.
Jobanyń ataýyndaǵy abbrevıatýranyń aǵylshyn tilindegi abolish testing aur mission sózderiniń birinshi áripterinen qurylyp, ıaǵnı «bizdiń mıssııamyz synaqtardy boldyrmaý» degendi bildiretinine qosa, onyń aıasynda ıadrolyq qarýǵa qarsylyq tanytatyn Jer sharynyń kez kelgen adamy álem úkimetterin ıadrolyq qarýdan máńgilikke bas tartýǵa jáne ıadrolyq synaqtarǵa jappaı tyıym salý shartynyń tezirek kúshine engizilýine shaqyratyn onlaın petısııaǵa qol qoıa alatynyn eske alsaq, AQSh Prezıdentine usynylǵan syıdyń astarynda qanshama salmaq, qanshama izgi murat jatyr deseńizshi.
Qazir 50 jasty alqymdap qalǵan Káripbek Kúıikov álemdi saıahattap, adamdarǵa ıadrolyq synaqtardyń adamzat ómirine qandaı keri áserin tıgizetinin aıtýdan talmaıdy. «Men sizderdi tek júregimmen ǵana qushaqtaımyn» dep Jer sharyn aralap, Germanııa, AQSh jáne Japonııanyń jeke kolleksııalaryna týyndylary qoıylyp, ıadrolyq synaqtarǵa laǵynet aıtqan onyń kúreskerligi de kópke úlgi. Adamnyń dene múshesiniń kemdigi bolsa da, ishki jan áleminiń kemtarlyǵynan saqtasyn!
«Bizdiń otbasymyzda taǵy eki bala bolǵan, alaıda, olar 1 jasqa tolar-tolmastan kóz jumdy. Meniń basymdaǵydaı tragedııa tek bizdiń otbasynda ǵana emes, ózgelerde de bolǵan. Balalary usqynsyz bolyp týǵan birqatar otbasylardy biletinmin. Ol ata-analar kelesi balalary saý bolyp týady dep úmittenetin. Alaıda, úmitteri aqtalmaı, naýqas balalar týa berdi. Týǵan on balasynyń barlyǵy da aýrý bolǵan otbasyny bilemin», – dep júrgen jerinde ıadrolyq qarýdyń sumdyǵyn jasyrmaı aıtyp, qalamymen qaırat tanytyp júrgen sýretshi týyndysy endi AQSh Prezıdentine ıadrolyq qarýdan bas tartýdyń qanshalyqty mańyzdylyǵyn árdaıym eske túsirip turatyn bolady.
Anar TО́LEÝHANQYZY,
«Egemen Qazaqstan».
Sýretterde: Káripbek KÚIIKOV pen onyń salǵan sýreti.
