Qoldan kelgenniń bári jasalýda

– Ǵ.Músirepov aýdanynda ornalasqan Sharyq gıdrotoraby erigen qar sýyna tolyp, keme­rinen asty. Sonyń saldarynan mańaıyndaǵy eldi meken tur­ǵyndaryn kóshirý jumys­tary bastaldy, – dedi qarǵyn sýdyń aýa jaıylýynan zardap shek­ken­derdiń jaıyn bilmek bolyp ha­bar­lasqanymyzda oblys­tyq tótenshe jaǵdaılar departa­mentiniń bas mamany Evgenıı Jýravlev. Jergilikti bılik oryndarynyń, ishki ister, tótenshe jaǵdaılar bólimderiniń jumyla kúsh salýynyń arqasynda sý qoımasyna taqaý ornalasqan Mádenıet aýy­lynan – 34, Gavrılovka aýylynan 78 adam qaýipsiz jerlerge qonystandyrylypty. Qardyń kúrt erýi saldarynan Aqqaıyń aýdanyndaǵy Smırnov kentiniń kóshelerin sý basqan. Basqa turǵyn úılerge de qaýip týyndaǵan. Astana qalalyq órt sóndirý jáne apattyq qutqarý qyzmetiniń ókilderi sý aıdaýǵa jiti kirisken. Shal aqyn aýdanyna qarasty Jańajol aýylynda da kúrdeli jaǵdaı qalyptasqan. Jylbysqy qarmen bitelip qalǵan sý aıdaý arnalary tazalanyp, qaýipti jerler ınertti materıaldarmen nyǵyzdalǵan. Sý shaıyp ketken Dobrojanov eldi mekeniniń 48 turǵyny basqa jaqqa kóshirilip, barlyq jaǵdaı jasalǵan. Sý tasqynynan Gorodeskoe eldi mekenin aman saqtap qalý maqsatymen 400 metr sý arnasy tazalanyp, bógetter turǵyzylǵan. Oblys basshysy Erik Sultanov pen IIM TJK tóraǵasynyń orynbasary Jasulan Jumashev qyzyl sý basqan eldi mekenderdi áýeden sholyp qaıtty. Jer­gi­likti turǵyndardy topan sýdan saqtaýǵa baǵyttalǵan qut­qarý jumystarymen tanysty. Shaǵalaly ózeniniń arnasyna, Úlken Torańǵul, Bozaral, Ba­lyqty, Sarykól kólderine, Ser­geev sý qoımasyna, Taıynsha, Aqqaıyń Esil aýdandaryna baqy­laý júrgizildi. Atqarylyp jatqan keshendi sharalarǵa qaramastan qaýip áli seıiler emes. Kesheden beri jaýǵan jańbyr jaǵdaıdy shıelenistirip jibergen jaıy bar. О́mir ESQALI, «Egemen Qazaqstan». Soltústik Qazaqstan oblysy.