Olımpıada chempıondarynyń sabaǵy

Astanadaǵy №56 mektep-lıseıdiń oqýshylary men oqytýshylar quramy Olımpıada chempıondarymen kezdesti. Kezdesýde 9-12 jastaǵy oqýshylar alǵash ret sporttyq jattyǵýlardy Olımpıada chempıondary Ermahan Ybyraıymovpen jáne Iýrıı Melnıchenkomen birge jasady. Sabaq Astana qalasy salamatty ómir saltyn qalyptastyrý ortalyǵynyń uıymdastyrýymen «Fızkýlt-Ýra!» áleýmettik jobasynyń aıasynda ótkizildi. Sharanyń maqsaty – jańa fıtnes tehnologııalardy qoldana otyryp, óskeleń urpaqtyń boıyna salamatty ómir saltyn qalyptastyrý, sportqa degen qyzyǵýshylyǵyn arttyrý. Atalǵan shara tolyq oqý jylyn qamtıtyn bolady. Aldaǵy kezde Olımpıada chempıondary mundaı sport sabaqtaryn Astananyń bes mektebinde uıymdastyrýdy maqsat etip otyr. – Bul shara alda kele jatqan Densaýlyq kúnine oraı josparlanǵan. Budan bólek 7 sáýir kúni «Densaýlyqqa arnalǵan 5 mınýt» aksııasy ótedi. Biz qalanyń basqa da mektepterinde 25 sabaqty ótkizýdi josparlap otyrmyz, – deıdi Ermahan Ybyraıymov. Ol kezdesýde qazir balalar men jasóspi­rimderdiń sportqa degen belsendiligi tómendep bara jatqanyn, telefondarǵa telmirip, plan­shetterdi jaǵalaǵan jetkinshekterdiń sportqa degen qyzyǵýshylyǵy kún sanap azaıyp otyrǵanyn aıtyp, osyndaı jobalardyń jıi-jıi qolǵa alynýy kerektigin atap ótti. «Astana» prezıdenttik kásibı sporttyq klýbynyń sport menedjeri Iýrıı Melnıchenko óz kezeginde deneshynyqtyrý sabaǵynyń, onyń júıesi men ádistemesiniń óte mańyzdy ekendigin aıtty. Ol sondaı-aq, ózge de áriptesterimen birge osy bir sharany qoldaı otyryp, arnaıy ýaqyt bólip, jınaǵan tájirıbelerin ortaǵa salýǵa daıyn ekenin málimdedi. Bul rette sport mamany olarǵa «Worldclass» fıtnes-klýbynyń kómekke keletinin de jetkizdi. – Bul ıgi bastamanyń tek basy ǵana. Densaýlyq kúnine oraı bıyl bas qalanyń barlyq emhanalary men aýrýhanalarynda bir sátte dene­shynyqtyrý jattyǵýlary jasalmaq. Buǵan qosa elimizdiń barlyq óńirlerinde túrli flesh-mobtar, jappaı júgirý jáne salamatty ómir saltyn nasıhattaýdyń basqa da aksııalary josparlanyp otyr, dedi Iýrıı Melnıchenko. Nazym QAIRAT, L.N.Gýmılev atyndaǵy EUÝ-diń stýdenti. ASTANA.