Aǵylshyn tili – álemniń kilti

Elbasymyzdyń úsh tuǵyrly til týraly aıtqan tujyrymy eldiń kóńilinen shy­ǵyp, zor qoldaýǵa ıe bolýda. Árıne, el bolǵan soń teli men tentegi, durys baǵdarlama ekendigin bilip turyp basy jerge jetkenshe órshelenip qarsy turatyn, ónbes daýdy qýatyn daýkes, eldi ádeıi adastyrmaq nıet­tegi adamdar da bolady. Olardyń dáleli negizsiz dep sanaı­myn. Meniń uǵymymda, aǵylshyn tilin bilý álemniń tilin bilý dep túsinemin. Biz sportshymyz. Elbasymyz úlken sport týraly tereń maǵynaly sóz aıtady. «Shetelde Qazaqstan Týy eki jaǵdaıda, Memleket basshysynyń jáne halyq­aralyq synda jeńiske jetken sportshynyń qurmeti úshin kóteriledi», deıdi. Bul bizdiń jaýapkershiligimizdi arttyrady, sheberligimizdi ush­taıdy,  jeńiske jetýge degen qushtarlyǵymyzdy jigerlendiredi. Bıyl Ońtústik Qazaqstan obly­synyń Rıo de Janeıroda ótetin Olımpıada joldamasynan qor­jyny toq. Altyn júldege talasatyn úkili úmitterimiz de bar. Sport sańlaqtaryn jigerlendirý, qıyn jaǵdaıda septesý úshin halyqaralyq jarystarǵa kóbirek jolymyz túsip júr. Sonda óz ana tilińnen bólek, orys jáne aǵylshyn tili mindetti túrde kerektigi baıqalady. Keshegi odaqtas on bes memleket, Táýelsiz Memleketter Dostastyǵy elderiniń bir-birimen uǵynysatyn tili – orys tili. Tatar túbi bir túrki jurty degenińmen, Qap taýynyń azamattarymen, cheshen, avar, qa­ra­shaı-sherkes nemese Saha, Tyva tilinde sóılese almaısyń. Seni olarmen jaqyndastyratyn sporttaǵy til – orys tili. Orys tilin bilýińniń arqasynda túsinisip, kóbimen tonnyń ishki baýyndaı jaqyndasyp ketesiń. Al, aǵylshyn tilin bilmeseń, qapqa sal­ǵan balyqtaısyń. Qazir álemde mońǵol sport­shylarynyń bási bólek. Ekonomıkasy, áleýeti bizden tómen dep ishteı teń kórmeıtin shyǵarmyz, qyzyǵy sol, sol mońǵol sportshylary aǵyl­shyn tilinde bulbuldaı saı­raıdy. О́mirlik qajettilik ekendigin memleket basshylary bilip, ol tildi balabaqsha, mektep baǵdarlamasyna qosqan. Búkil órkenıettiń kilti aǵyl­shyn tilindegi oqýlyqtarda desek, bul tildi qazaq halqy úshin de jaqsy bilýdiń mańyzy zor. Memleket basshysy Nursultan Ábishuly Nazarbaevtyń qazaqtyń balasy órkenıet ıgiligine qol sozsyn, bilimdi jurttyń qatarynda bolsyn degen nıetin bárimiz bilip, oryndalýyna atsalysýymyz kerek. Qazaqstandaǵy bilikti ustaz, ǵalym, psıhologtar halyqaralyq aǵylshyn, orys tilderin bala­baqshadan bastap oqytýdyń tıimdi ekendigin aıtady. Sebebi, aqyl-oıy tunyq, aıtqandy lezde qaǵyp alatyn búldirshinder tildi tez ıgerip ketedi eken. Búgingi jastar – qabiletti, aldaǵy bolashaǵyna alań­daıtyndyǵymen erekshelenedi. Olar mektep, joǵary oqý oryn­darynan bólek, aǵylshyn ti­lin arnaıy kýrstarda oqyp, bolashaǵynyń baspaldaǵyn óz kúshimen qalap jatyr. Iаǵnı, kóp til bilý qajettilik, ózińe paıdasynan basqa zııany joq.  Álibek Nurtaev, Ońtústik Qazaqstan oblystyq dene­shynyqtyrý jáne sport basqarmasynyń basshysy ShYMKENT