Qostanaıda bıznesti damytýǵa 1 mıllıard teńge bólindi

QOSTANAI. 26 sáýir. «Báıterek» ulttyq basqarýshy holdınginiń basqarma tóraǵasy Qýandyq Bıshimbaevtyń Qostanaı oblysyna sapary barysynda osy holdıngtiń enshiles uıymdarynyń biri «Damý» kásipkerlikti damytý qorynyń basqarma tóraǵasy Qanysh Tóleýshın men oblys ákimi Arhımed Muhambetov orta jáne shaǵyn bıznesti damytý jónindegi memorandýmǵa qol qoıdy. Bul týraly egemen.kz tilshisi habarlady. Atalǵan shara aıasynda shaǵyn jáne orta bıznesti damytýdyń óńirlik baǵdarlamasyn júzege asyrý úshin Qostanaı oblystyq ákimdigi 500 mıllıon teńge, «Damý» kásipkerlikti damytý qory 500 mıllıon teńge qarajat bóletin boldy. Qarajat ekinshi deńgeıli bankter arqyly beriledi. Baǵdarlamaǵa qatysýshylarǵa salalyq shekteý qoıylmaıdy. Nesıe aınalymdaǵy qarajatty tolyqtyrý jáne qural-jabdyqtardy jańǵyrtý úshin bólinip otyr. Bıznesi bar kásipkerler úshin 80 mıllıon teńgege deıin, al bıznesti jańa bastaǵandar úshin 20 mıllıon teńgege deıin beriledi. Jyldyq syıaqy mólsheri 8,5 paıyzdy quraıdy. Atalǵan baǵdarlamaǵa sáıkes nesıe alǵan kásipkerlerdiń kepilge múlki jetimsiz bolǵan jaǵdaıda «Damý» qorynyń kepildemesin paıdalana alady. Qor basshysy Qanysh Tóleýshın: «О́ńirdiń damý baǵytyna oraı, aýyldaǵy jáne aýdandaǵy jobalarǵa basymdyq beriletin bolady. Burynǵyǵa qaraǵanda ústeme paıyz azaıyp keledi, qarajat qoljetimdi bola túsken. Biz Qordyń kirisi azaıatynyn túsinemiz, biraq Qor paıdanyń astynda qalýdy emes, kásipkerlerge arzan, uzaq merzimdi ári qoljetimdi nesıe berýdi maqsat etkendikten osyndaı qadamǵa baryp otyr», – dedi. Názıra Járimbetova. Derek, sýret: egemen.kz.