«Halyq ómiri onyń kelesi urpaǵymen jalǵasyp otyrady. Sondyqtan Halyqtyń Máńgiligi týraly armannan asqaq arman joq. Máńgilik El – bul erteńgi kúnge esik ashatyn, bolashaqqa senimdi arttyratyn ıdeıa, bul – keri qaıtpaıtyn jáne berik turaqtylyqtyń sımvoly...»
N.Á.Nazarbaevtyń Qazaqstan Respýblıkasynyń
Táýelsizdik kúnine arnalǵan saltanatty jıynda sóılegen sózinen
2014 jylǵy 15 jeltoqsan
Biz, baıyrǵy qazaq jerinde bir taǵdyr jáne tarıhı jad arqyly baılanysqan, Uly Dala Eliniń dańqty tarıhy men dástúrlerin jalǵastyrǵan Qazaqstan azamattary, kóptegen urpaqtyń Táýelsizdik týraly armanyn iske asyryp, bolashaq urpaq aldyndaǵy qasıetti paryzymyzdy, beıbitshilik pen kelisimniń, birlik pen tutastyqtyń mańyzdylyǵyn sezinip, qoǵam men memlekettiń joǵary múddelerin negizge ala otyryp, Táýelsizdiktiń 25 jyldyq mereıli jylynda osy Máńgilik El – patrıottyq aktisin qabyldaımyz. Elbasy, Qazaqstan Respýblıkasynyń Tuńǵysh Prezıdenti Nursultan Nazarbaevtyń kóshbasshylyǵymen jańa Qazaqstannyń tarıhyn jazýdyń bıik mártebesi men jaýapkershiligi bizdiń urpaqtyń úlesine tıdi. Elbasynyń mańyna toptasý arqyly biz uly jetistikterge toly joldan óttik jáne búginde ózimizdi Táýelsiz Qazaqstannyń – qýatty ári tabysty memlekettiń azamatymyz dep maqtanyshpen aıtamyz. Biz, Qazaqstan azamattary, Nursultan Nazarbaevtyń tarıhı «Táýelsizdik tolǵaýyn» negizge ala otyryp, Bolashaǵy Birtutas El – Máńgilik Eldi qurý jolynda birgemiz. Máńgilik Eldiń ózeginde qarapaıym, túsinikti jáne bizdiń árqaısymyz úshin eń qymbat aqıqattar – otbasymyzdyń amandyǵy, qonaqjaılyq jáne eńbeksúıgishtik, turaqtylyq, qaýipsizdik jáne birlik, erteńgi kúnge degen senim uǵymdary ornyqqan. Biz Máńgilik Eldiń myzǵymas Jeti tuǵyryn nyǵaıtýǵa, saqtaýǵa jáne urpaqtan urpaqqa amanat etýge shaqyramyz. Máńgilik El, bul–Táýelsizdik jáne Astana. Biz Táýelsizdikti nyǵaıtýdyń tarıhı uly mıssııasyna adal bolamyz. Biz Astanany halqymyzdyń gúldenýi men qýatynyń jarqyn belgisi retinde árqashan maqtan tutatyn bolamyz. Máńgilik El, bul – Jalpyulttyq birlik, beıbitshilik pen kelisim. Bizdiń Otanymyz bir, ol – Táýelsiz Qazaqstan, bizdiń elimiz bir – taǵdyrymyz ortaq. Beıbitshilik pen kelisimniń uly isine adal halyqtyń ǵumyry myńjyldyqtarǵa jalǵasady. Máńgilik El, bul –Zaıyrly Memleket jáne Joǵary Rýhanııat. Azamattyq jáne rýhanı qundylyqtardyń birligi bizge óz jolymyzdy tabýǵa jáne ózimizdi búkil álemge máshhúr etýge múmkindik berdi. Biz elimizdiń biregeı rýhanı kelbetin aıqyndaıtyn dinder men órkenıetterdiń jahandyq únqatysýyn odan ári jan-jaqty damytatyn bolamyz. Máńgilik El, bul –Innovasııa negizindegi turaqty Ekonomıkalyq О́sim. Biz memlekettiń ındýstrııalyq jáne ınnovasııalyq kúsh-qýatyn damytyp, tabıǵı resýrstar men qorshaǵan ortaǵa uqyptylyqpen qarap, qoǵamda bilim men ǵalymdyq kýltin eldiń zııatkerlik irgetasy retinde bekitetin bolamyz. Máńgilik El, bul – Jalpyǵa Ortaq Eńbek Qoǵamy. Eldiń barlyq tabystary men jetistikteri – barsha qazaqstandyqtardyń kún saıynǵy qajyrly eńbeginiń nátıjesi. Biz eldiń árbir azamatynyń jasampazdyq áleýetin júzege asyrý úshin jaǵdaı jasaı otyryp, eńbeksúıgishtik jáne jaýapkershilik, Eńbek Adamyna qurmet syndy qundylyqtarymyzdy nyǵaıtamyz. Máńgilik El, bul –Tarıhtyń, Mádenıet pen Tildiń ortaqtyǵy. Biz ortaq tarıhı muramyzdy muqııat saqtaıtyn bolamyz. Biz Qazaqstan halqynyń mádenı áralýandyǵyn arttyra túsemiz. Biz memlekettik tildi qoǵamdy biriktirýdiń negizi, úshtildilikti Eldiń básekege qabilettiliginiń basty sharty retinde damytý qaǵıdatyn ustanatyn bolamyz. Biz – Úlken El – Úlken Otbasymyz. Máńgilik El, bul – Ulttyq qaýipsizdik jáne Qazaqstannyń jalpy álemdik jáne óńirlik problemalardy sheshýge jahandyq turǵydan qatysýy. Biz óz jetistikterimizdi qorǵaýǵa tıispiz. Ulttyq qaýipsizdikti nyǵaıtý árbir azamattyń, óz eli patrıotynyń qasıetti paryzy bolyp sanalady. Biz beıbitshilik pen kelisim ıdeıasyn ilgerilete otyryp, elimizdiń halyqaralyq arenada moıyndalǵan bedelin nyǵaıta túsetin bolamyz. Biz Máńgilik Eldiń qasterli qundylyqtaryn basshylyqqa alamyz. Biz Otanymyzdyń kók baıraǵyn asqaqtata kóterip, elimiz jetken jańa bıikterde jelbiretetin bolamyz. Bul – bizdiń bolashaq urpaq úshin, Qazaqstan halqynyń amandyǵy men gúldenýi úshin jasaǵan sanaly tańdaýymyz! Birtutas Elimiz – Máńgilik El qýatty bolsyn! Qazaqstannyń máńgilik mekeni – Uly Dala Eline bata qonyp, baq darysyn! Alǵa, Qazaqstan!
