Ámına Kóshkimbaeva – Qazaqstan Respýblıkasy Áskerı-teńiz kúshteriniń sarbazy. Aqtaýdaǵy áskerı-teńiz bazasynyń qupııa bóliminde is júrgizýshi bolyp qyzmet etetin ol, tııanaqtylyǵymen, tyndyrymdylyǵymen jáne ójettigimen syıly. Mańǵystaý oblysynyń munaıly Jańaózen qalasynda 1987 jyly ómirge kelip, óndiristi óńirdiń óreni bolǵan qyzdyń ańsary múldem basqa salaǵa aýdy. Qııaly óz bolashaǵyn ádemi áskerı formamen sap túzep bara jatqan sarbazdar arasynan izdettirdi. Qatar-qurbylarynyń kóbi munaı salasyna jumysqa turýǵa qulshynyp jatqanda, Ámınany kishkentaı kezinen formaǵa degen qyzyǵýshylyǵy áskerı salaǵa qaraı tarta jóneldi.
Otbasy, bala tárbıesimen biraz aınalysqan soń ol aqyry óz armanyna qaraı qol sozyp, 2009 jyly ásker qataryna qabyldandy. Qazir Aqtaý qalasyndaǵy áskerı teńiz-bazasynda 1-dárejeli starshına laýazymynda júrgen ol bazada qyz qurbylarynyń qatary kóbeıip kele jatqandyǵyn aıtady. – Alǵashynda qyzdar az edi, qazir 20-ǵa tarta qyzdar barmyz. «Qyzdarǵa áskerı ómir qıyn emes pe?» dep jatady, óz qyzmetińe degen mahabbat jáne Otanyńa degen patrıottyq sezim qıyndyqtyń bárin eńseredi, tózimdi bolýǵa, jigerli bolýǵa shyńdaıdy. Áskerı kıimmen júrý, qarý asyný, olardy shashyp-qurastyrý, polıgonǵa baryp áskerı synaq tapsyrý, dabylǵa turý jáne áskerı salanyń temirdeı tártibi qıyn bolǵanmen, áserli. О́zińniń táýelsiz Qazaqstannyń qorǵaýshysy ekenińdi sezine júrip eńbek etseń – qıyn jumystyń ózinen rahat alatyn bolasyń, – deıdi Ámına Tólegenqyzy.
Sóıtsek, qaısar minezdi jaýynger qyz jany názik ónerpaz bolyp shyqty. Mańǵystaý oblysyndaǵy Murat О́skinbaev atyndaǵy fılarmonııa sahnasynda án shyrqaǵan arý áskerı salada da óz ónerin ógeısitpepti. 2012 jyly Otar qalasynda ótken «Jas ulan» sarbaz ánderi baıqaýynda ekinshi oryn alsa, 2013 jyly Taraz qalasynda ótken atalmysh baıqaýda laýreat atanǵan. 29011 áskerı bóliminiń kúndelikti tynys-tirshiligine belsendi qatysatyn Á.Kóshkinbaeva túrli baıqaýlar men festıvalderge, patrıottyq aksııalarǵa qatysyp, óz talantymen, shyǵarmashylyq qabiletimen áskerı bólimniń namysyn qorǵap júr. Jumystaǵy jaýaptylyǵyna, tabandylyǵyna jáne talantyna oraı Qazaqstan Respýblıkasy Qarýly Kúshterine 20 jyl, Qazaqstan Respýblıkasy Qarýly Kúshteri Áskerı-teńiz kúshterine 20 jyl merekelik medaldarymen marapattalǵan. «Álııa men Mánshúktiń, Hıýazdyń sińlileriniń jasyq bolýǵa haqy joq», deıdi Ámına. Ishki ister salasynda qyzmet etetin joldasy ekeýi otbasynda ul bala tárbıelep otyr. Qazir 3-synypta oqıtyn ulyn Ámına bolashaqta áskerı saladan kórgisi keledi.
Sol sebepti ony Baýyrjan Momyshuly atyndaǵy áskerı mektepte oqytqysy keletindigin aıtty. – Aldymda arman-josparlarym kóp. Aldymen, ózimniń súıikti qyzmetim men ónerimdi ushtastyryp, áskerı mýzykant bolǵym keledi. Osy maqsatyma jetý úshin bilim alýdy oılap júrmin. Ekinshiden, qazaq sanyn kóbeıtýge óz úlesimdi qosýdy da anylyq paryz sanaımyn. Qudaıǵa shúkir, elimiz aman, jerimiz tynysh. Beıbit zaman. Áskerılerdiń barlyq jaǵdaıy jasalynǵan. Jalaqy merziminde berilip turady. Bizge oqýǵa da, jumys jasaýǵa da múmkindik mol. Alla elimizdi osy tynyshtyǵynan aıyrmasyn, – deıdi ol sabyrly qalypta. Durys-aq. Otandy qorǵaýmen birge onyń bolashaq býynyn kóbeıtý, tárbıeleý de – negizgi mindetterdiń biri. Ámına bul týraly da oılanady eken. 1-dárejeli starshına Á.Kóshkimbaeva bizben Qazaqstandaǵy barsha áriptesterine sáttilik tilep qoshtasty. Júzi jyly bolǵanmen, minezi talapshyl, júregi «Otanym» dep soqqan qaısar qyzǵa biz de sáttilik tiledik.
Gúlaıym ShYNTEMIRQYZY, «Egemen Qazaqstan» Mańǵystaý oblysy
