«Tre Krýnýr» tegeýrin tanytty

Mamyrdyń 11-i kúni túnde Reseıde ótip jatqan hokkeıden álem chempıonaty irikteý týrnıriniń kezekti matchynda Qazaqstan quramasy Shvesııa komandasymen kezdesti. Álemdegi eń tańdaýly hokkeı jasaǵynyń biri bolyp tabylatyn «Tre Krýnýrmen» oıynnan pálendeı ońdy nátıje kúte qoıǵan joqpyz. Sondyqtan, bizdiń jamaǵattyń odan 3:7 bolyp utylyp qalǵanyna asa qatty tańǵala da qoımadyq. Degenmen, matchtyń basy bu­ǵan deıin týrnırde ótkizgen úsh kezdesýinde de tabandylyǵymen, jankeshtiligimen, talpynysymen tanylǵan komanda bul joly da sol bedeline qylaý túsirmeıtin sııaqty bolyp kóringen. Qazaqstan muzdy aıdyn serileri oıyndy jaman bastaǵan joq. Alaıda, qarsy qaqpanyń qarasyn qaraýylǵa alýda kibirtikteı berdi. Munyń esesine, qandaı jaǵdaıda da ózine tıimdi sátti qalt jibere qoımaı­tyn qarsylastarymyz oılamaǵan jerden esep ashyp ketti. Sóıtip, 13-mınýtta Mıkael Ballýnd talqandaýdyń ilki qadamyn jasady. Sol-aq eken, qazaqstandyqtardyń qorǵanys qatary setinep sala berdi. Arada 3 mınýt ótkende Lınýs Klasen esepti ósirse, taǵy 1 mınýttan soń Adam Larsson ony 3:0-ge jetkizdi. Abyroı bolǵanda, bizden Dastın Boıd kezeńniń sońǵy sekýndtarynda bir shaıbanyń qarymtasyn qaıtara aldy. Ekinshi kezeńde shvedter basym­dylyqtaryn taǵy eki shaıbaǵa arttyrdy. Olardy 25 jáne 29-mınýttarda Gýstav Nıýkvıst túsirdi. Al úshinshi kezeńniń bas jaǵynda bizdiń hokkeıshilerge de osylaı bir mınýttyń aınalasynda qatarynan eki gol salyp ketýdiń oraıy keldi. Onyń birinshisin 47-mınýtta Vladımır Markelov qarsy qaqpaǵa attandyrsa, ekin­shisin kelesi mınýtta Roman Savchenko óz esebine jazdy. Budan ári oıynnyń sońǵy núktesin qoıý múmkindigin shvedter aldy. Ony 55-mınýtta salǵan Nıýkvıst het-trıkke qol jetkizdi. Match barysynda Qazaqstan quramasy eki ret aıdynda oıynshylary kóp kezinde óz qaqpasyna shaıba saldyryp aldy. Munyń ózi komandanyń qorǵanys shebi kiltıpandy ekenin kórsetti. Áıt­kenmen, soǵan qaramastan, jigitter bul joly da oıyn arasynda shıelenis týǵyzyp turýǵa qabiletti ekenderin baıqatyp qoıdy. Burnaǵy kúni sondaı-aq Shveı­sarııa Latvııany 5:4, Fınlıandııa Vengrııany 3:0 etip tize búktirdi. Bul kúni belorýstar slovaktardy 4:2 etip utyp, taǵy bir sensasııany ómirge ákeldi. Al keshe Chehııa – Norvegııa, AQSh – Fransııa, Reseı – Danııa, Kanada – Germanııa quramalary kezdesti. Búgin qazaqstandyqtar chehtarmen muz aıdynyna shyǵady. Osy kúni munymen qatar AQSh – Vengrııa, Danııa – Latvııa, Germa­nııa – Belarýs ushyrasady. Mamyrdyń 11-i kúngi oıy­n­dardyń qorytyndysy boıynsha A tobynda Chehııa, Shvesııa (ekeýinde de – 8 upaı), V tobynda Fınlıandııa (12) men Kanada (9) kósh bastap keledi. Rýslan IGILIK