Qazaqstandyq qarý-jaraq

kórmesine 100-den asa otandyq kompanııa qatysady KADEX kórmesi Qorǵanys mınıs­trli­giniń uıymdastyrýymen 2010 jyldan beri ótkizilip keledi. Alǵashqy kezde atalǵan sharaǵa 156 kompanııa qatysqan. Sol jyly kórme negizinde 1,5 mlrd. AQSh dollary somasynda 10 uzaq merzimdi qujatqa qol qoıyldy. Qazaqstannan 86 kásiporyn óz ónimderin usynyp, sheteldik áriptesterimen kelisimsharttar jasasqan bolatyn. Qazirgi kezde Astana halyq­aralyq áýejaıynyń áskerı sektorynda «KADEX-2016» ha­lyq­aralyq kórmesine qyzý daıyn­dyq jumystary júrgizilýde. Pavıl­ondardyń qurylysy salynyp jatyr. Jaqyn arada áskerı tehnıkalar ákelinedi. Qolda bar málimetterge qaraǵanda, osy tehnıkalardyń biraz bóligin Reseı Federasııasy usynady. Bul el joǵary tehnologııalyq tankige qarsy zymyran keshenderi men shabýyldaý qarý-jaraqtaryn kórsetedi. Reseıde qarý-jaraq pen oq-dárilerdi jasaýda «KBP» AQ zaýytynyń 85 jyldyq táji­rıbesi bar. Al «Vologda op­tı­ka-mehanıkalyq zaýyty» AQ kompanııasy brondy tankti teh­nı­kaǵa arnalǵan júıelerdi (T-90, T-80Ý, BMP-3, BTR-80, MT-LBM) jetkizedi. Kanada «Series – 400» ushaǵyn tanystyrady. Ol 19 adamǵa arnalǵan. Áskerı tehnıkany «Viking Air Ltd» áýe ǵaryshtyq kompanııasy shyǵarady. Kórmege jyl saıyn qatysyp kele jatqan Fransııa da óz ónimderin kórsetýden qalys­paıdy. Bul memleket dúnıe júzi boıynsha zymyran júıelerin shyǵaratyn kóshbasshy el bolyp sanalady. Bıylǵy sharaǵa Fransýz Respýblıkasynyń «MBDA» kompanııasy ónimderiniń túr-túrin kórsetedi. Bizdiń elden «KADEX-2016» kórmesinde birneshe kompa­nııa­nyń ónimderi usynylady. So­lardyń biri – «Semeı ınjınırıng» AQ T-72 tankterin, jaıaý áskerdiń JÁJM-1 urys mashınala­ry men BTR-70 brondy transporterlaryn daıyndap jatyr. Bul kásiporynnyń brondy tankti tehnıkany jón­deıtin jáne áskerı jáne áskerı-ınje­nerlik tehnıkanyń bazasynda konversııalyq tehnıkany daıyndaıtyn zaýyty bar. «Qazaqstan paramaýnt ınjınırıng» JShS «Ar­lan» mınadan qorǵana alatyn brondalǵan avtomobıldi, arnaıy áskerler, arnaıy maqsattaǵy jaýyngerler men áskerı polısııaǵa ar­nalǵan dońǵalaqty mashınany usynady. Bul mashına jol tań­damaıdy. Qaı jermen bolsa da júre beredi. Dastan KENJALIN, «Egemen Qazaqstan»