Ortalyq kommýnıkasııalar qyzmetinde Jer reformasy boıynsha komıssııanyń birinshi aptadaǵy jumysy qorytyndylandy. Oǵan Premer-Mınıstrdiń birinshi orynbasary, Jer reformasy boıynsha komıssııanyń tóraǵasy Baqytjan Saǵyntaev, komıssııa tóraǵasynyń orynbasarlary «Nur Otan» partııasy Tóraǵasynyń birinshi orynbasary Muhtar Qul-Muhammed, Aýyl sharýashylyǵy mınıstri Asqar Myrzahmetov qatysty.
«Elbasynyń tapsyrmasymen qurylǵan jer reformasy jónindegi komıssııa ótken senbide óz jumysyn bastaǵan bolatyn. Sol bir apta aralyǵynda atqarylǵan is-sharalar týraly málimet bereıik dep otyrmyz. О́tken senbidegi otyrysta aıtylǵandaı, Aýyl sharýashylyǵy mınıstrligi janynan shtab qurdyq, sol shtab óz jumysyn bastap ketti. Jəne komıssııanyń hatshylyǵy da óz jumysyn bastady. Qazir komıssııa músheleri aıtqan jəne qarapaıym halyqtan kelip jatqan usynystardyń barlyǵy shtabta talqylanyp, senbi, 21 mamyr kúngi kezekti otyrysymyzda qorytyndy shyǵarylady. Oǵan qosa, komıssııanyń call-ortalyǵy jumys isteıdi. Telefon nómiri – 1434. Bul nómirdi de ótken senbi kúni jarııa etkenbiz. Sodan beri, ıaǵnı bir apta ishinde osy nómir arqyly aımaqtardan 700-den astam usynys qabyldandy, dep məlim etti Baqytjan Saǵyntaev.
«Usynystardyń eshbiri qaraýsyz qalmaıdy, – dep ýəde etti B.Saǵyntaev. – Jer máselesine qatysty usynystardyń barlyǵy komıssııanyń qaraýyna shyǵarylady. Sonymen qatar, əleýmettik jelilerde jáne buqaralyq aqparat quraldarynda jazylyp jatqan usynys-pikirlerdiń barlyǵy qaralyp jatyr. Buǵan qosymsha, Almaty men Astana qalalarynyń jáne oblys ákimderiniń janynan qurylǵan qoǵamdyq keńester óz jumystaryn bizben qatar bastady. Qazirgi kezde olar ózderiniń kezdesýlerin ótkizýde. Olarda da osy máselege baılanysty suraqtardyń barlyǵy talqylanady. Qajetti usynystar, oı-pikirler bolsa, onyń bári komııassııa qaraýyna jiberiledi.
Iаǵnı, barlyq usynystar qaralatyn bolady deı alamyz. Buǵan qosa, «Nur Otan» partııasy bul iske belsendi túrde kiristi. О́ziniń oblystardaǵy fılıaldarymen birge jumysyn bastap ketti. Ərbir adam osy jandy taqyryp jaıly ózin tolǵandyrǵan oıyn jetkize alady. Elbasy atap ótkendeı, «jer úshin shyn jany aýyratyn adam óz oıyn ashyq aıtýy kerek. Sol sebepten de men barshańyzdy osy máseleni belsendi talqylaýǵa shaqyramyn».
О́tken senbide komıssııa músheleriniń tarapynan komıssııa jumysyn bastaǵan soń, belgili bir jumys toptaryn quryp, ár jumys toby óz baǵytynda jumys istesin degen usynys aıtylǵan edi. Sol usynys qabyldanyp, qazir tórt top qurylǵan. Birinshi jumys toby – ekonomıkalyq, ekinshisi – quqyq salasyn qamtıtyn, úshinshisi – resimderdiń zańdylyǵy men ashyqtyǵyn qamtamasyz etý toby, tórtinshi jumys toby komıssııa sheshimderin túsindirý men aqparattandyrý toby bolady.
B.Saǵyntaev túsindirip ótkendeı, Jer reformasy boıynsha komıssııanyń shtaby qazir komıssııaǵa múshe árbir adamnyń pikirin bilip, qaı jumys tobynda jumys isteýge nıeti bar ekenin anyqtap jatyr. «Kelesi otyrysymyzda, ıaǵnı aldaǵy senbi, 21 mamyr kúni tórt toptyń quramy men toptardyń jetekshileri bekitiledi», dedi B.Saǵyntaev.
Komıssııa tóraǵasy atap ótkendeı, kelesi otyrystardyń barlyǵy belgili bir baǵytqa arnalyp ótedi. Mysaly, osy senbidegi komıssııanyń otyrysy Jer kodeksinde jerdi satý máselesi joq ekenin talqylap, túsindirýge arnalady. Komıssııa maýsym aıynan bastap óńirlerge shyǵýdy josparlap otyr. О́ńirlerge shyqqanda ákimdikterdiń janynan qurylǵan qoǵamdyq keńestermen jáne sol jerlerdegi qoǵamdyq uıymdarmen birlese otyryp osy máseleni árbir óńirde talqylaıdy.
Buryn Ulttyq ekonomıka mınıstrligine qaraǵan jer máselesimen endi Aýyl sharýashylyǵy mınıstrligi aınalysatyn boldy. Atap aıtqanda, Aýyl sharýashylyǵy mınıstrliginiń ishinen jańadan Jer resýrstaryn basqarý komıteti quryldy. Bul týraly Aýyl sharýashylyǵy mınıstri Asqar Myrzahmetov málim etti.
«Elbasynyń Jarlyǵyna sáıkes, Ulttyq ekonomıka mınıstrligine qaraǵan jer máselesin Aýyl sharýashylyǵy mınıstrligine berý týraly sheshim qabyldandy. Osyǵan oraı, seısenbi kúni Úkimet otyrysynda Aýyl sharýashylyǵy mınıstrliginen arnaıy komıtet, ıaǵnı Jer resýrstaryn basqarý komıtetin qurý týraly sheshim qabyldandy. Ulttyq ekonomıka mınıstrliginde istegen qyryq jeti qyzmetker AShM ishinen qurylǵan osy komıtetke aýysyp jatyr», dedi mınıstr. A.Myrzahmetovtiń málimetine súıensek, call-ortalyǵyna kelip túsken osy 700 usynys-pikirdiń 90 paıyzy jerdi jekemenshikte paıdalaný tóńireginde bolyp otyr eken.
Dınara BITIKOVA,
«Egemen Qazaqstan»