Keshe Astanada Shanhaı yntymaqtastyq uıymyna (ShYU) múshe memleketterdiń joǵary qarjy baqylaý organdary basshylarynyń úshinshi kezdesýi ótti.
Is-sharaǵa Qytaı Halyq Respýblıkasy, Qyrǵyz Respýblıkasy, Qazaqstan Respýblıkasy, Reseı Federasııasy, Tájikstan Respýblıkasy, О́zbekstan Respýblıkasy joǵary qarjy baqylaý (memlekettik aýdıt) organdarynyń birinshi basshylary jáne ókilderi qatysty.
Syrtqy ister mınıstri Erlan Ydyrysov quttyqtaý sóz sóıledi.
Kezdesýge qatysýshylar ekonomıkanyń turaqsyzdyǵy men jahandyq táýekelder jaǵdaılarynda memlekettik aýdıtti júrgizýdiń tıimdiligin arttyrý problemalaryn talqylady. Memlekettik qarjylyq baqylaý (aýdıt) salasyndaǵy ózekti máseleler jáne yntymaqtastyq perspektıvasy jóninde pikirler almasyldy.
Kezdesýge qatysýshylar aldynda sóılegen sózinde Esep komıtetiniń tóraǵasy Qozykórpesh Jańbyrshın Prezıdent N.Á.Nazarbaevtyń tapsyrmasy boıynsha 2016 jyldan bastap memlekettik aýdıtke kóshý jumystary júrgizilip jatqanyn, onyń negizgi mindeti tek qarjylyq buzýshylyqtardy anyqtaý ǵana emes, sonymen qatar, olardyń týyndaý sebepterin aıqyndaý jáne aldyn alý ekenin atap ótti.
«Qalyptasqan ekonomıkalyq ahýal jáne resýrstardyń shekteýligi jaǵdaılarynda memlekettik aýdıt organdary bıýdjet qarajatyn paıdalaný tıimdiligin arttyrýǵa barynsha járdemdesýleri tıis. Osyǵan baılanysty, bizdiń elderimizdiń memlekettik aýdıt jáne qarjylyq baqylaýynyń joǵary organdarynyń kúsh-jigerin biriktirý ShYU qyzmetiniń mańyzdy baǵyttarynyń biri», dedi ol.
Esep komıteti tóraǵasynyń aıtýynsha, joǵary qarjy baqylaý (memlekettik aýdıt) organdarynyń ShYU sheńberindegi ózara is-qımyly aýdıtorlyq is-sharalar júrgizý, praktıkalyq tájirıbemen jáne bilimmen erkin jáne ashyq almasý, jańa syn-tegeýrinderge den qoıýdyń barynsha ónimdi ádisterin ázirleý jáne memlekettik aýdıttiń nátıjeliligin arttyrý jolymen áleýetti óristetýge jáne kásibıliktiń ósýine járdemdesetin bolady.
QHR bas aýdıtory Lıý Szıaı aldyńǵy kezeńdegi ShYU-ǵa múshe memleketterdiń joǵary qarjy baqylaý organdarynyń ózara is-qımyly týraly esepti baıandama jasady.
Sondaı-aq, Qyrǵyzstan Esep palatasynyń tóraǵasy Ýlýkbek Marıpov, Reseı Esep palatasynyń aýdıtory Aleksandr Jdankov, Tájikstan Esep palatasynyń tóraǵasy Dılmýrod Ashýrbek jáne О́zbekstan Esep palatasy tóraǵasynyń orynbasary Kahramon Akmalov baıandama jasady.
Kezdesýdiń qorytyndysy boıynsha ShYU-ǵa múshe memleketterdiń JQBO yntymaqtastyǵy sheńberinde 2016-2017 jyldarǵa arnalǵan is-sharalar jospary, birlesken málimdeme jáne hattama qabyldandy.
«Egemen-aqparat»