Kókshetaýda sút jáne ony qaıta óńdeý ónimderiniń ózindik qunyn arzandatýǵa arnalǵan memlekettik sýbsıdııalardy zańsyz ıemdený deregi boıynsha sot úkimi jarııalandy. Aıyptalýshylarǵa 152 mln teńge kólemindegi bıýdjet qarajatyn jymqyrdy degen aıyp taǵyldy, dep habarlaıdy Egemen.kz.
Qarjylyq monıtorıng agenttiginiń Aqmola oblysy boıynsha departamentiniń málimetinshe, eki jyl boıy «MolProdJarkaın» SPK dırektory Efımkına men «Rassvet» sharýa qojalyǵynyń basshysy Maslov zańsyz sýbsıdııa alyp otyrǵan.
Tergeý deregine sáıkes, «Rassvet» qojalyǵynda kórsetilgen kólemde sút óndirýge jetkilikti mal basy bolmaǵan. Soǵan qaramastan, elektrondyq shot-faktýralar aqparattyq júıesinde «MolProdJarkaın» mekemesine 3 mln kılogramnan astam shıki sút jetkizildi degen jalǵan qujattar rásimdelgen.
583 mln teńgeden astam zalal: Túrkistanda mektep qarjysyn jymqyrǵan 14 adam sottaldy
Osy qujattardyń negizinde sútti sary maı men qatty irimshikke óńdeý týraly esep jasalyp, sýbsıdııa alýǵa ótinimder berilgen. О́tinimder maquldanǵannan keıin qarajat kásiporyn shotyna aýdarylǵan. Memleketke keltirilgen jalpy shyǵyn 152 mln teńgeni qurady.
Tergeý barysynda alynǵan sýbsıdııanyń bir bóligin Efımkına týysynyń depozıttik shotyna aýdarǵany anyqtaldy. Bul qarajatqa jyljymaly ǵımarat satyp alynyp, keıin ol jalǵa berilip otyrǵan.
Qylmystyq is aıasynda 6 jer telimi, 4 páter, 11 avtokólik, jyljymaly ǵımarat jáne óndiristik nysanǵa tyıym salyndy.
Aqtóbede prokýror ustaldy: Sheneýnik 10 mln teńge para aldy degen kúdikke ilindi
Sot sheshimimen Maslov pen Efımkına árqaısysy 6 jyl 4 aı merzimge bas bostandyǵynan aıyryldy. Jyljymaly ǵımarat memleket kirisine tárkilendi. Qalǵan múlikke salynǵan tyıym azamattyq talap boıynsha shyǵyn tolyq ótelgenge deıin saqtalady.
Úkim zańdy kúshine endi.