Jamby atý – qazaq halqynyń ulttyq jaýyngerlik oıyny. Ertede keń taraǵan mergender synynyń bul oıyn túri sońǵy ýaqytta múlde umytyla bastaǵandaı edi. Búginde ony qaıta jandandyrý maqsatynda oblystyq balalar men jasóspirimderdiń sport mektebinde jamby atý ulttyq sport túrinen jarys uıymdastyrylǵandyǵyn estigende, kóńilimiz bir jadyrap qaldy.
Ertede jamby atý oıynynda atpen shaýyp kele jatyp jigitter ekpinin báseńdetpesten, qurýly baqan ústindegi nysanany atyp qulatýy tıis bolǵan. Ereje boıynsha jigitter sórede óz sáıgúlikteriniń janynan tabylýlary kerek. Tóreshi belgi bergennen keıin olar attaryn tez erttep, shaba jónelip, jolyndaǵy nysanalardy atyp qulatýlary qajet bolatyn. Tóreshilerdiń uıǵarymymen nysanalar da birnesheý bolýy múmkin.
Oblys tarıhynda tuńǵysh ret uıymdastyrylyp otyrǵan bul ulttyq sport túriniń saltanatty ashylýyna Krasnoıar aýyldyq okrýginiń ákimi Bazarbaı Ábýov pen oblystyq deneshynyqtyrý jáne sport basqarmasy basshysynyń orynbasary Álimjan Moldaǵalı qatysyp, qatysýshylarǵa sáttilik tiledi. Sonymen qatar, oblystyq balalar men jasóspirimder sport mektebiniń ulttyq sport túrleriniń jattyqtyrýshysy, jamby atýdyń daıarlyq kýrsynan ótken Aıbolat Estaı qatysýshylarǵa arnap, jamby atýdan sheberlik synybyn ótkizdi.
Jamby atýǵa barlyǵy 28 talapker qatysty. Jasóspirimder túregelip turyp, 10 metr qashyqtyqty 5 márteden kózdedi. Munda 32 upaı jınaǵan krasnoıarlyq Rahman Dáýlethan top bastady. Zerendi aýdanynyń Ortaq aýylynan kelgen Nursultan Oral odan bir upaı kem jınap, ekinshi orynnan kórindi. Úshinshi oryn krasnoıarlyq Sanjar Baltabaevqa buıyrdy. Al eresekter arasyndaǵy saıysta Kókshetaý qalasynyń turǵyny Serik Nurpeıisov 31 upaımen úzdik dep tanylsa, onyń jerlesi Erbol Tuqaev 25 upaı jınap, ekinshi oryndy ıelendi. Krasnoıar turǵyny Esbergen Syzdyqov úshinshi oryndy mise tutty.
Osyndaı ulttyq oıynnyń uıymdastyrylýyna qolushyn berip, demeýshilik jasaǵan Qaırat Qursarın, Dáýren Qanapın jáne Erbol Tuqaev sekildi ult janashyrlarynyń izgi nıetine súısinis bildirmeske bolmaıdy.
Jalpy, árbir Olımpıadalyq oıyndardan keıin onyń baǵdarlamalaryna engen sport túrleriniń halyqaralyq birlestikteri ony qaıta qarap, túzetýler, ózgerister engizip jatady. Qazaq halqynyń ulttyq sport túrleriniń erejelerin de qaıta qarap, zaman talabyna saı ózgertýge bolady. Mysaly, jamby atý bıatlonnyń erejesine saı ózgertýge keledi. Tek shańǵynyń ornyna at kerek. Sonda jańa sport túri jazǵy bıatlon, ıaǵnı «qazaq bıatlony» ómirge keler edi.
Yrysaldy ShAMShIEVA
Aqmola oblysy