Shyǵys Qazaqstan oblysynyń Shemonaıha qalasynda jańa ınfeksııalyq aýrýhananyń qurylys alańynan adam súıekteri tabyldy. Bul jaǵdaı jergilikti turǵyndar arasynda úlken úreı týǵyzyp, áleýmettik jelilerde qyzý talqylanyp jatyr, dep habarlaıdy Egemen.kz.
Jumys qyzyp jatqan alańnan adam qańqalarynyń shyǵýy turǵyndardy eski qorymdar týraly oıǵa qaldyrdy. Jurtshylyq «bul jerde ondaǵan jyldar buryn qaýipti ınfeksııadan kóz jumǵandar jerlengen bolýy múmkin» dep qaýiptenedi.
Shemonaıha aýdanynyń ákimdigi bul jerde buryn shynymen de ınfeksııalyq aýrýhana bolǵanyn jáne onyń janynda jerleý rásimderi ótkizilgenin rastady. Alaıda, sheneýnikter úreıge boı aldyrýǵa negiz joq ekenin alǵa tartyp otyr. Mamandardyń aıtýynsha, bul ýchaskege baılanysty eshqandaı qaýipti indet oshaqtary tirkelmegen.
Qazirgi ýaqytta tabylǵan súıekterdi qoldanystaǵy zıratqa qaıta jerleý josparlanǵan. Bılik ókilderi barlyq prosedýralar zań talaptaryna saı, sanıtarlyq qaýipsizdik sharalaryn qatań saqtaı otyryp júrgiziletinine ýáde berdi.