Memleket basshysy Qasym-Jomart Toqaev «Taza Qazaqstan» aksııasy aıasynda janýarlarǵa qamqorlyq jasaý mádenıetin qalyptastyrý máselesine arnaıy toqtaldy, dep habarlaıdy Egemen.kz.
Prezıdent úı janýarlaryna qatygezdik kórsetkender úshin jazany barynsha qatańdatýdy tapsyrdy.
«Úı janýarlarynyń adamdardan qorlyq kórýine jol bermeý kerek. Úkimet úı janýarlaryn durys kútip-baptamaǵandarǵa beriletin ákimshilik jaýapkershilikti qatańdatyp, al olarǵa qatygezdik kórsetkenderge kesiletin qylmystyq jazany kúsheıtýi kerek. Negizi, qańǵybas ıtter problemasyna azamattardyń nemquraılylyǵy sebep: ıaǵnı olar bastapqyda janýarlarǵa yqylasy aýyp asyraǵanymen, keıinnen kóńilderi qalyp, kereksiz zattaı kóshege tastap ketip jatady. Mundaı keleńsizdikterdiń aldyn alý qajet», dedi Memleket basshysy.
Prezıdent janýarlarǵa qamqorlyq jasaý isinde «haıpqa» jol bermeı, naqty iske kóshý kerektigin aıtty.
Janýarlardy qorǵaý jáne qoǵam qaýipsizdigi: Qańǵybas ıtterdiń shabýylyna qalaı tosqaýyl qoıamyz?
«Sondaı-aq eshqandaı «haıpqa» jol bermeı, mamandandyrylǵan janýarlar ortalyqtarynyń qyzmetine qoǵamdyq baqylaý qoıǵan jón. Bul iske sizder de úles qosasyzdar dep oılaımyn. Jalpy, qańǵybas ıtterge qamqorlyqpen qaraý qoǵamnyń arasyna syna qaqpaýǵa tıis. О́ńirlerden alǵan aqparatqa sáıkes, balalar, tipti, eresekter jabaıy ıtterden jıi zardap shegýde. Basty másele – osy. Sondyqtan bul problemaǵa memleket pen jurtshylyqtyń, naqty aıtqanda, zań shyǵarý turǵysynan Parlamenttiń aralaspasyna bolmaıdy. Biraq biz qorǵansyz janýarlardy jábirlegen faktilerge de beı-jaı qaramaýymyz kerek, atap aıtqanda, úı janýarlaryn azaptaǵandardy qylmystyq jaýapkershilikke tartqan durys. Osyndaı tásilder qorshaǵan ortaǵa ozyq ári jaýapty kózqaras qalyptastyrady dep oılaımyn. Bul da «Taza Qazaqstan» aıasynda atqarylýǵa tıis istiń biri», dedi Prezıdent.