ASTANA. 5 maýsym. Úndistannyń Delı qalasyndaǵy aýrýhanalarda adam búıregin zańsyz satatyn toptardyń bar ekeni anyqtaldy. Bul týraly inform.kz aqparyna súıengen egemen.kz tilshisi habarlady.
Qazirgi tańda osy iske qatysty Apollo Hospital aýrýhanasynyń eki qyzmetkeri tutqyndaldy. Sol sııaqty taǵy úsh adamnyń qatysy bar ekeni anyqtaldy. Belgili bolǵandaı, kúdiktiler osy ispen aınalysyp paıda taýyp júrgen eken.
Polıseıler olardyń turmysy tómen adamdardy búıregin satýǵa úgittegenin málimdedi. Málimetter boıynsha, bir búırektiń quny 7,5 myń dollarǵa deıin barǵan. Bir qyzyǵy, dárigerler bul zańsyz áreketterden múldem habarsyz bolypty. Sebebi, jalǵan operasııaǵa qatysýshylar óz múshelerin týystaryna bergen degen qujat jasaǵan.
Aıta keteıik, Úndistanda transplantasııa úshin organdar jetispeıdi. Osynyń saldarynan zańsyz áreketter jıi oryn alady.
Aıan Ábdýálı.
Derek, foto: inform.kz.