Memleket basshysynyń tapsyrmasyna sáıkes zańsyz ıemdenilgen aktıvterdi qaıtarýdan túsken qarjyǵa túrli nysan salynyp jatyr. Sondaı eki nysannyń qurylysy Qyzylqoǵa aýdanynda qolǵa alyndy.
Onyń biri – temirjol boıynda ornalasqan Jamansor eldi mekeninde bastalǵan mektep-ınternattyń qurylysy. Shaǵyn aýylda mektep jasyndaǵy 200-ge jýyq bala bar. Munda bastaýysh synyptyń oqýshylary 60 orynǵa beıimdelgen ǵımaratta bilim alady. Alaıda mektepke beıimdelgen nysanda sport pen májilis zaly joq.
Byltyr bastaýysh synyptar men daıyndyq toptarynda 64 bala tirkelipti. Aýyl turǵyndaryn joǵary synyptardyń oqýshylary Atyraý men Qulsary qalalaryndaǵy, Maqat, Muqyr stansalaryndaǵy mektep-ınternatta oqyp júrgeni qynjyltady. Sol sebepten byltyr atalǵan eldi mekende qaıtarylǵan qarjyǵa mektep-ınternattyń qurylysy bastaldy. Bilim berý nysanynda eki blok qarastyrylypty. Bloktyń biri – 80 oryndyq mektep, al ekinshisi – 30 orynǵa eseptelgen ınternat.
Qyzylqoǵa aýdany ákimdiginiń málimetine súıensek, bilim ordasynyń qurylysyna qaıtarylǵan qarjydan 2 mlrd 89 mln teńge bólinipti. Qurylys jumystaryn «Jıenbaı» JShS júzege asyryp jatyr. Mektep-ınternattyń qurylysyn bıyl tolyq aıaqtaý kózdelip otyr. Demek, ózge bilim ordalaryna qatynap oqyp júrgen jamansorlyq oqýshylary aldaǵy jańa oqý jylynda aýyl mektebine barady.
Al ekinshi nysan – Mııalydan Taısoıǵan aýylyna tartylyp jatqan sý qubyry. Onyń qurylysyn «Sapa qurylys 2007» JShS júrgizýdi qolǵa aldy. Atalǵan joba aıasynda jalpy uzyndyǵy 73,5 shaqyrym magıstraldy sý qubyryn tartý, 12 sý uńǵymasyn qazý kózdelip otyr. Qazir merdiger mekeme barlyq uńǵymany tolyq qazyp, 66 shaqyrym sý qubyryn júrgizip úlgerdi. Endi polıetılen qubyrlaryn biriktirý jumysy eki ýchaskede qatar atqarylyp jatyr. Budan soń sý aıdaý nysandaryn salý josparlanypty.
«Jobanyń jalpy quny 6 mlrd 877 mln teńgeden asady. Onyń ishinde 5 mlrd teńge elimizge qaıtarylǵan aktıvter esebinen bólindi», dep habarlady aýdandyq ákimdikten.
Taısoıǵan – Qyzylqoǵa aýdanynda 2006 jyly qurylǵan okrýg. Munda 2010 jyly 220 oqýshyǵa eseptelgen mektep, 2015 jyly dárigerlik ambýlatorııa paıdalanýǵa berildi. Úsh jyl buryn aýdan ortalyǵy Mııalydan atalǵan aýylǵa qaraı 45 shaqyrymdy quraıtyn qatqyl tabandy tas joldyń, keıin sport kesheniniń, balalarǵa arnalǵan oıyn alańynyń qurylysy bastaldy. Qazir okrýgte 60-tan astam sharýa qojalyǵy, tórt kásipkerlik dúken ashylǵan. Úsh kásipker jolaýshylar tasymalymen aınalysady. Aýyl turǵyndary gaz jelisimen, telefon baılanysymen, kitaphana, klýbpen qamtylyp otyr.
Atyraý oblysy