Májilis tóraǵasy Erlan Qoshanov bastaǵan «Ádiletti jáne progressıvti Qazaqstannyń halyqtyq Konstıtýsııasy úshin!» jalpyulttyq koalısııasy Qaraǵandy oblysyna bardy. Jurtshylyqpen, professor-oqytýshy quramymen, stýdenttermen, shahterlermen, mádenıet qaıratkerlerimen, jergilikti mádenı qaýymdastyqpen, aýyl turǵyndarymen kezdesýlerde jańa Ata zań jobasynyń mazmunyna qatysty oramdy oı-pikirler aıtyldy.
Jańa Konstıtýsııa jobasynyń normalary jónindegi talqylaý Qaraǵandy oblysynyń jurtshylyǵymen jáne Qazaqstan halqy Assambleıasynyń ókilderimen kezdesýden bastaldy. Dostyq úıinde qoǵam qaıratkerleri, etnomádenı birlestikter ókilderi, máslıhat depýtattary jáne pikir kóshbasshylarynan quralǵan 200-ge tarta adam jınaldy.
Kezdesýde aıtylǵan negizgi máseleler bıliktiń barlyq tarmaǵyn jańartý, etnosaralyq beıbitshilik máseleleri, qazirgi qoǵamdyq kelisim ınstıtýttarynyń transformasııasy jáne jańa konsýltatıvtik organ – Halyq keńesin qurý boldy. Májilis tóraǵasy Erlan Qoshanov jańa Konstıtýsııa jobasynyń qundylyqtary qoǵamdy ádildik, zańdylyq jáne barlyq azamattarǵa teń múmkindikter sııaqty aıqyn jáne túsinikti basymdyqtar negizinde biriktiretinin atap ótti.
«Táýelsizdikti saqtaý men nyǵaıtý jolyndaǵy basty mindet – memleketimizdiń ishki turaqtylyǵyn jáne tutastyǵyn qamtamasyz etý. Bul másele jańa Ata zań jobasynda naqty kórsetilgen. Onda bılik ınstıtýttarynyń quzyretteri men fýnksııalary aıqyn ári naqty belgilenip, olardyń arasyndaǵy teńgerim tolyq saqtalǵan. Jańa Konstıtýsııa jobasynda Qazaqstanda prezıdenttik basqarý formasy saqtalatyny, Memleket basshysy Konstıtýsııanyń kepili bolyp, memlekettik apparattyń úzdiksiz, úılesimdi ári júıeli jumysyn qamtamasyz etetini kórsetilgen», dedi E.Qoshanov.
Májilis tóraǵasy atap ótkendeı, jańa Konstıtýsııa jobasy – prezıdenttik reformalar baǵytynyń júıeli iske asyrylýy men keń aýqymdy qoǵamdyq talqylaýdyń naqty nátıjesi.
Qazaqstan halqy Assambleıasy qyzmetiniń transformasııasy týraly sóz qozǵalǵanda koalısııa músheleri Assambleıanyń turaqtylyqty qamtamasyz etip, etnosaralyq kelisimdi nyǵaıtýda mańyzdy tarıhı ról atqarǵanyn atap ótti. Prezıdent usynǵan jańa ınstıtýt – Halyq keńesi halyq birligin nyǵaıtýdaǵy jańa qadam bolyp, etnomádenı birlestikterdiń ókilderin, máslıhat depýtattaryn jáne azamattyq sektor ókilderin biriktirýge tıis.
Qazaqstan halqy Assambleıasy tóraǵasynyń orynbasary Marat Ázilhanov sózinde halyqtyq Konstıtýsııa qoǵamdyq kelisim, halyq birligi jáne etnosaralyq dıalog qaǵıdattaryn nyǵaıtatynyn atap ótti. Onyń aıtýynsha, qujat «biz ártúrlimiz, biraq teńbiz» qaǵıdatyn bekitip, etnosyna nemese óńirine qaramastan, barsha azamat múmkindiginiń teńdigine kepildik beredi.
Aımaqtyq koalısııa múshesi jáne «Vaınah» birlestiginiń tóraǵasy Ývaıs Djanaev Qaraǵandy tarıhı turǵyda kópetnosty óńir ekenin atap ótti. Qazirgi ýaqytta munda 60-tan asa etnomádenı birlestik jumys isteıdi. Ol jańa býyn Assambleıa músheleriniń qoǵamdyq jumysqa belsene aralasatynyna toqtaldy.
Mazmundy áńgime E.A.Bóketov atyndaǵy Qaraǵandy ulttyq zertteý ýnıversıtetinde zııaly qaýym ókilderi, professorlyq-oqytýshylyq quram men stýdent jastar arasynda jalǵasty. Talqylaýǵa shamamen 500 adam qatysty. Ashyq formattaǵy dıalog qatysýshylarǵa jańa Konstıtýsııany qabyldaýdyń tarıhı mańyzy, bilim júıesiniń bolashaǵy, jastar men ıntellektýaldy eńbektiń el damýyna qosatyn róli jóninde pikir almasýǵa múmkindik berdi.
Kezdesýde Májilis depýtaty Ashat Aımaǵambetov pen Ǵylym jáne joǵary bilim mınıstri Saıasat Nurbek jańa Ata zań jobasynda el damýynyń basym baǵyttary retinde alǵash ret ǵylym men bilim bekitilgenin atap ótti.
Koalısııa músheleri qoǵamda jańa Konstıtýsııa jobasynyń mazmuny týraly tereń pikir qalyptastyrýshy retinde oqytýshylar men akademııalyq qaýymdastyqtyń rólin erekshe atap ótti. Kezdesý barysynda qatysýshylar bilim, ǵylymı zertteý qyzmeti, ǵylymı jobalar men ınnovasııalyq bastamalardy qoldaý Ata zańnyń basym baǵyttaryna aınalatynyn aıtty.
«Qarmet» kásipornynda shahterler men metallýrgter kásipodaq uıymdarynyń basshylarymen jáne ókilderimen áńgime mazmundy ótti. Kásipodaq ókilderi jańa Konstıtýsııa mátinimen tanysqanyn jáne ondaǵy negizgi ıdeıa – «Adam memleket úshin emes, memleket adam úshin» qaǵıdasyn tolyq qoldaıtynyn atap ótti. Eńbek adamdarynyń pikirinshe, qujattaǵy negizgi basymdyqtar tynyshtyq pen turaqtylyq, erteńgi kúnge senim jáne otbasylarynyń amandyǵy men ál-aýqaty bolyp otyr.
Aqyndar, jazýshylar men termeshilerdiń qatysýymen ótken dıalog shyǵarmashylyq mamandyqtardy qoldaý, tarıhı dástúrlerdi saqtaý jáne mádenı murany jańa Konstıtýsııada bekitý máselelerine baǵyttaldy.
Koalısııa músheleri zııaly qaýym nazaryn aldaǵy referendýmnyń tarıhı mańyzyna aýdaryp, bul keler urpaq úshin ulttyq ónerdi damytý men saqtaýdyń berik quqyqtyq negizin qalyptastyratynyn jetkizdi.
Jalpyulttyq koalısııanyń sapary Buqar jyraý aýdanyna qarasty Gagarın aýylynda óz máresine jetti. Munda aýyl turǵyndary – qandastar, qarttar, jastar, belsendi azamattarmen kezdesý ótti.
Talqylaýdyń basty taqyryby Ata zańnyń jańa redaksııasynda adamnyń ómiri men qadir-qasıetiniń eń joǵary qundylyq retinde bekitilýi boldy. О́z kezeginde aýyl turǵyndary adam kapıtalyn bilim, ǵylym jáne ınnovasııalar arqyly damytý mańyzdy basymdyq ekenin atap ótti.
Barlyq kezdesýdiń qorytyndysy boıynsha Qaraǵandy oblysynyń turǵyndary referendýmǵa qatysý eldiń aldaǵy baǵytyn qalyptastyratyn mańyzdy qadam ekenin atap ótti.