Beıneý-Shalqar temirjoly qurylysy bastalǵan kezeńde-aq mańǵystaýlyqtar: «Almatyǵa deıingi jol qysqaratyn boldy», dep qýanǵan edi. Alaıda, temirjol qurylysy aıaqtalyp, paıdalanýǵa berilgenmen, jańa jol boıymen ázirge jolaýshylar tasymaldaıtyn poıyzdardyń jiberilmeıtindigi aıtylǵan.
Mańǵystaýlyq jolaýshylardyń qýanatyn da jóni bar. О́ıtkeni, kórshimiz Qyzylorda oblysy arqyly tikeleı jetýge bolatyn Almatyǵa barý úshin, kerisinshe jolǵa shyǵýǵa týra keledi. Iаǵnı, Atyraý baǵytyna bet alyp, Maqat stansasynan Aqtóbe oblysynyń aýmaǵyna qaraı burylyp, Qandaǵashtan ońtústikke qaraı júrgende, syzyq boıymen aıtsaq, bir qabyrǵasy joq tórtburysh syndy artyq júris jasap baryp Shalqarǵa jetetin. Bul uzaq jol, artyq júris qaqaǵan qysta da, aptap ystyqty jazda da jolaýshylar úshin qolaıly bolmaǵany anyq.
Bıyl 6 shildeden bastap jańa jolmen jolaýshylar poıyzy jiberilip, «Mańǵystaý-Almaty» poıyzy jolǵa shyqpaq. Temirjol vokzaly anyqtamasynyń málimetinshe, burynǵy 74 saǵat 17 mınýttyq jol endi 63 saǵat 28 mınýt bolyp qysqarsa, bılet baǵasy 1 myń teńgedeı aıyrmashylyqqa ıe. Iаǵnı, Mańǵystaýdan Almatyǵa deıin kýpe vagon quny 11 097 teńge bolsa, plaskart vagon úshin 7 095 teńge. Sondaı-aq, jalpy qashyqtyǵy 3269 shaqyrymdy qurap kelgen jol 471 shaqyrymǵa qysqaratyn bolady. Demek, jolaýshylar dittegen jerine burynǵydan 10 saǵatqa erte jetedi dep kútilýde.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy