Arýjan Saın – qaıyrymdylyq isterimen qazaqqa keńinen tanymal esim. Alǵash «Sentr tıajestı» ınternet forýmynyń «Qaıyrymdylyq» salasy boıynsha óz jumysyn bastap, kóptegen ıgi istermen Arýjan irgetasyn 2006 jyly qalaǵan «Erkin meıirimdilik qoǵamy» dep atalatyn qoǵamdyq qor elimizde qaıyrymdylyq isimen aınalysatyn eń iri qorlardyń biri.
Ekinshi myńjyldyqtyń basynda bir top jas eriktiler sábıler úıindegi jetim balalarǵa kómektesýge baryp, sol jerde aýyr dertke shaldyqqan bir búldirshinge kúrdeli ota jasaýǵa kómek kerek bolǵanynan habardar bolady. Kisi kóńiline jubanysh, jetimge jebeý bolýdy kózdegen sol eriktilerdiń qatarynda Arýjan da bar edi.
Mine, Arýjan syrqat sábıge kómek kerek ekendigin ǵalamtor betinde jarııalap, kópshilikke habar taratady. Ǵalamtor qoldanýshylar arasynda bul aqparat jedel tarap, tipti elimizdegi iri kompanııalar da kómek qolyn sozǵysy keletindigin, alaıda qomaqty qarajatty jeke adam qolyna berý múmkin emes ekendigi anyqtalady. Osyndaı qajettilikterden keıin Arýjan qoǵamdyq qor quryp, jarymjan jandardyń aýyrtpalyǵyn kóterýge bel sheship kirisedi.
Alaıda, jetim balalar úıindegi dertti sábıge kómektesý tym kesh edi. Aýrýy asqynǵan beıkúná sábıdi qutqaryp qalýǵa keshikkenimen, Arýjan basqaratyn qoǵamdyq qaıyrymdylyq qor kúni búginge deıin túrli deńgeıdegi syrqatqa shaldyqqan 1419 balanyń ýaqtyly em alýyna, jas ómirin saqtap qalýyna sebepker boldy. Jany júdeý músápirdi dalaǵa tastamaıtyn jyly júrekti qazaqstandyqtardyń qoldaýymen 1,5 myńnan astam aýyr dertke shaldyqqan sábıge kómek kórsetildi. Osy ýaqyt aralyǵynda Arýjan Saın basqaratyn qor 2 mıllıard 63 mıllıon 309 myń 841 teńge qarajat jınap, talaı otandasymyzdyń, onyń ishinde aýyr syrqatqa shaldyqqan búldirshinderdiń janyna arasha bola bildi.
Byltyr, ıaǵnı 2015 jyly Elbasy Nursultan Nazarbaev elimizdiń tarıhynda jeke tulǵa jasaǵan eń iri qoldaý kómek retinde Arýjanǵa 300 myń AQSh dollary kóleminde qarjylaı kómekti tabys etip, onyń Jańa Jibek jolynyń jandanýyna jáne damýyna qosqan úlesi úshin marapat-syı kórsetti.
Qazirde Arýjannyń esimi Qazaq dalasynda qurmetpen atalyp, taǵdyry qıynshylyqpen bastalǵan talaı jannyń aýyrtpalyǵyna qanatymen sý tasyǵan qarlyǵashtaı eńbekqorlyǵymen keńinen tanymal boldy. Ol aralaspaǵan, ol saqtap qalýǵa úles qospaǵan jas ómir, dertti sábı kemde-kem. Arýjan basqaratyn qaıyrymdylyq qorǵa kómek surap keletin kisi, jazylatyn hat-habarda qısap joq. Árıne, onyń adaldyǵy men iskerligine tánti bolǵan demeýshiler de reti kelgende qoldaý kórsetip, qoǵamnyń bir muńyn da bolsa azaıtýǵa, bir otandasymyzdyń kóńil bultyn seıiltýge beıim.
Arýjannyń armany kóp. Qoǵamda jetim balalar úıi bolmasa eken dep te, sábı ataýly syrqatqa shaldyqpasa eken dep te, Qazaq elinde búldirshinderdiń shat kúlkisi máńgi jalǵasyp, eshbir adam ata-ana bolý quqyǵynan aıyrylmaı, eshbir sábı shańyraq jylýyn ańsamaı, tek beıbit te berekeli el bolsaq eken dep kóp oılaıdy. Oılap qana qoımaı, sol jolda ómirine aýyrtpalyqtyń kóleńkesi túsken jandarǵa kómek qolyn sozýǵa únemi kómektesip júredi. Sonyń nátıjesinde «Erkin meıirimdilik qoǵamy» qoǵamdyq qory – Qazaqstanda emdelmeıtin, aýyr naýqas balalarǵa kómek kórsetýge baǵyttalǵan «Balalarǵa ómir syıla», «Jetimdersiz Qazaqstan» jáne «Aýtızmdi jeńemiz!» qaıyrymdylyq sharalarynyń bastamashysy ári uıymdastyrýshysy bolyp talaıdyń alǵysyna bólene bildi.
Arýjan elimizdiń, ásirese, Almaty qalasynyń qoǵamdyq ómirine qyzý atsalysyp otyrady. Osyndaı sergek oıly, azamattyq jaýapkershilikke degen sanaly qadamdarynyń jemisi bolsa kerek Arýjan 2016 jyly Almaty qalasynda qaıta qurylǵan qoǵamdyq keńeske múshe bolyp qabyldandy.
Budan ózge, Arýjan Saın televızııalyq jobalar men tele-serıaldar túsirý isine prodıýser retinde belsene aralasady. Belgili shoýmen Murat Ospanov júrgizetin «Taksı» tele-shoýy, «Karaoke-taksı», «Dengı v dom», «Kýhnıa», «Balapan» arnasynda kórsetiletin balalar men jasóspirimderge arnalǵan «Bıle-bıle» jáne «Kishkentaı Nıýton» baǵdarlamalary «Arýjan jáne kompanııa» prodıýserlik ortalyǵy túsirip, qalyń kórermenniń kózaıymyna aınalǵan teletýyndylar.
Qanat ESKENDIR,
«Egemen Qazaqstan»
ALMATY