Jaıdary jaz kúnderi lagerde bolyp, jańa dostar taýyp, sýǵa túsip, kúnge qyzdyrynǵan qandaı ǵanıbet. Ásirese, joryqqa shyǵyp, keshki dıskotekalarda kóńil kóterý kóp ýaqyt boıy esten ketpesi anyq. «Embimunaıgaz» kompanııasynyń sharapatty isiniń arqasynda, Atyraý oblysyndaǵy áleýmettik-álsiz topqa jatatyn halyqtyń 300 balasy Ońtústik Qazaqstan óńirindegi «Mashat-Arasan» saýyqtyrý lagerinde masaty maýsymdy oıdaǵydaı ótkizip dem aldy.
Atyraý oblysynyń túrli aýdandarynan kelgen balalar on eki kún ishinde «Embimunaıgaz» AQ-tyń demeýshilik jáne qaıyrymdylyq baǵdarlamasy boıynsha bólingen qarajat esebinen densaýlyqtaryn túzedi. Olar negizinen kórikti taý qoınaýyndaǵy «Mashat-Arasan» lagerinde boldy.Syldyrap aqqan taý ózenderi men kókmaısaǵa oranǵan bel-belester, samal jel. Bári-bári jetkinshekterdiń kóńilin kóterip, rahatqa bóledi. Keshki astan keıin jalpylagerlik sharalarǵa qatysyp, komandalar arasyndaǵy ártúrli konkýrstarǵa qatysty. Lager dırektorynyń tárbıe jumysy jónindegi orynbasary Nurǵazy Albaev atyraýlyq balalardyń bos ýaqyttaryn barynsha kóńildi ótkizýlerine uıytqy boldy. Olardyń súıikti isterimen aınalysýyna jan-jaqty jaǵdaı jasap, tikeleı ózi qadaǵalap otyrdy.
– Lagerdegi barlyq oqytýshylar men tárbıeshiler negizinen Túlkibas aýdanyndaǵy mektep-gımnazııalardyń jáne mektepterdiń joǵary sanatty muǵalimderinen jasaqtaldy. Alǵashqy kúnderi alystan kelgen balalar úılerin saǵynyp kóńilsiz júrgenderi de ras. Keıinnen olar lager tártibine beıimdelip ketti. Densaýlyǵy nashar keıbir balalar da sporttyq sharalarǵa qatysýǵa ynta tanytty, – deıdi Nurǵazy Albaev.
Saýyqtyrý lagerinde balǵyndardyń bos ýaqyttaryn mazmundy ótkizýine oraılastyrylyp baǵdarlamalar jasaldy. Sonyń nátıjesinde belsendilik kórsetken balalardyń qatary artty.
– Medısınalyq taldaý kórsetkenindeı, atyraýlyq balalardyń kópshiligi qalqansha bezi, anemııa, ımmýnıteti tómen, ishek-qaryn jolynyń álsizdigi sııaqty syrqattarmen aýyrady eken. Sondyqtan munda kún saıyn balalar shıpaly shópter qaınatpasy men ottegi kokteılin iship densaýlyqtaryn birshama túzetti. Ásirese, artyq salmaǵy bar balalarǵa shıpasyn tıgizdi, – deıdi lagerdiń dáriger-pedıatry Nábıra Áýbákirova.
– Men kelesi jyly osy lagerge taǵy da kelýdi uıǵaryp otyrmyn. Maǵan Shymkent qalasyna jasaǵan ekskýrsııa óte unady. Biz saıabaqtar men haıýanattar baǵyn tamashaladyq. Al bizden jasy úlken balalar Túrkistan qalasyna sapar shegip, qyzyqtap qaıtty, – dep óz áserin bólisti Atyraý oblysynyń Qulsary qalasyndaǵy №21 mekteptiń oqýshysy, on eki jastaǵy Albına Tájikova.
– Biz lagerdegi alǵashqy kúnderi úıimizdi qatty saǵynyp, qaıtqymyz keldi. Sodan keıin boı úıretip, sportpen jáne basqa da shyǵarmashylyqpen aınalysyp, bos ýaqytymyzdy kóńildi ótkizdik. Konkýrstarǵa qatysyp, baǵymyzdy synadyq, – deıdi Albınanyń qurbylary atyraýlyq Álııa Sabyrova men Gúlnaz Joldasova.
– «Embimunaıgaz» AQ elimizdiń munaı ónerkásibiniń bastaýynda turǵan kásiporyn bolyp sanalady. Mekeme árkez balalarǵa erekshe nazar aýdarady. Kompanııa bas dırektorynyń birinshi orynbasary Qurmanǵazy Esqazıevtiń jáne basqarma músheleriniń tikeleı bastamashylyǵymen balalardy Shymkenttegi lagerge jiberý biraýyzdan qoldaý tapty. Osylaısha jetkinshekter Ońtústik óńirde kóńildi demalyp, kúsh-qýat jınady. Budan artyq qandaı qýanysh bolsyn. Aldaǵy kezde de kásiporyn ıgilikti isin jalǵastyra bermek, – dedi kompanııanyń áleýmettik saıasat departamentiniń dırektory Qýandyq Qalıdýllın.
Marat AQQUL,
«Egemen Qazaqstan»