Azamattyq qorǵanys salasyndaǵy mamandardy daıarlaıtyn elimizdegi jalǵyz joǵary oqý orny – Kókshetaý tehnıkalyq ınstıtýtynda jas ofıserlerdiń kezekti, 18-shi shyǵarylymy ótkizildi.
«Táýelsizdik» alańyndaǵy saltanatty sharaǵa Qazaqstan Respýblıkasy Ishki ister mınıstriniń orynbasary Iýrıı Ilın, Aqmola oblysy ákiminiń orynbasary Nurlan Nurkenov, qurmetti qonaqtar men ata-analar qatysty.
Bilim ordasynyń bastyǵy azamattyq qorǵanys polkovnıgi Syrym Sháriphanov Iýrıı Ilınge kúndizgi oqý bóliminiń túlekterin shyǵaryp salý saltanatyna ınstıtýttyń daıyn ekendigin baıandady. Vıse-mınıstr men oblys ákiminiń orynbasary, tótenshe jaǵdaılar qyzmetiniń ardagerleri jas ofıserlerdi quttyqtap, aldaǵy qyzmetterine tabystar tiledi. Al ata-analar atynan sóılegen Eleýsiz Qulmaǵambetov pen oqýdy úzdik bitirgen leıtenant Beksultan Rahymbaev Qazaqstan Táýelsizdiginiń 25 jyldyǵy atap ótiletin jylda úlken ómir jolyna joldama bergen ınstıtýttyń oqytýshy-professorlar quramyna alǵystaryn bildirdi.
Bıyl Kókshetaý tehnıkalyq ınstıtýtyn 102 túlek áskerı is jáne qaýipsizdik bakalavrynyń «О́rt qaýipsizdigi» mamandyǵy boıynsha bitirip otyr. Sonymen qatar, Reseı TJM Memlekettik órtke qarsy qyzmet akademııasyna jáne Azamattyq qorǵanys akademııasyna ınstıtýt atynan jiberilgen 19 kýrsant joǵary bilim alyp shyqty. Buǵan qosa, Qazaqstan men Qyrǵyzstannyń halyqaralyq kelisimderi boıynsha Qyrǵyzstannyń TJM úshin tuńǵysh ret eki mamandyq boıynsha ınjener-ofıserlerdiń daıarlanǵanyn ınstıtýt ómirindegi erekshe oqıǵa deýge bolady.
Barlyq túlekter elimizdiń óńirlerinde ornalasqan Qazaqstan Respýblıkasy Ishki ister mınıstrligi Tótenshe jaǵdaılar komıtetiniń aımaqtyq bólimshelerine joldama aldy.
Túlekterge leıtenant pogondary men dıplomdary tabys etildi.
Kókshetaý tehnıkalyq ınstıtýtyndaǵy tanymdyq dástúrlerdiń biri jaýyngerlik týmen qoshtasý bolyp tabylady. 2016 jylǵy túlekter atynan Jaýyngerlik týmen qoshtasý quqyǵy azamattyq qorǵanys leıtananty Abylaı Baıanovqa berildi. Ol – 4 jyl boıy kýrs starshınasynyń kómekshisi bolyp, kýrsta jáne ınstıtýtta ótkizilgen barlyq is-sharalarǵa belsene qatysqan kýrsanttardyń biri.
Saltanat dástúrli «ofıserlik bımen» aıaqtaldy.
Baqbergen AMALBEK,
«Egemen Qazaqstan»
KО́KShETAÝ