Astanada shaǵyn fýtboldan buqaralyq aqparat quraldary arasynda jazýshy, pýblısıst Seıdahmet Berdiqulovty eske alýǵa arnalǵan respýblıkalyq týrnır ótti.
Týrnırdiń ashylý saltanatynda Mádenıet jáne sport mınıstrligi sport jáne deneshynyqtyrý isteri komıtetiniń tóraǵasy Elsııar Qanaǵatov pen Parlament Májilisiniń depýtaty Saýytbek Abdrahmanov sóz sóılep, komandalarǵa sáttilik tiledi.
Jarys bastalmas buryn, Seıdahmet Berdiqulovtyń atyndaǵy syılyqtyń laýreattary anyqtaldy. «Úzdik jarııalanym» nomınasııasy boıynsha «QazAqparat» aqparat agenttiginiń Batys Qazaqstan oblysyndaǵy menshikti tilshisi Ǵaısaǵalı Seıtaq, úzdik televızııalyq reportaj jasaǵan «Habar» telearnasynyń jýrnalısi Qanat Bazylhan jáne úzdik fotojumysy úshin Alekseı Fılıppov ıe boldy. Jeńimpazdar arnaıy «Seıdahmet Berdiqulov atyndaǵy syılyqtyń laýreaty» tósbelgisimen jáne dıplommen marapattaldy.
Osymen 19-ret ótkizilgen týrnırge bas-aıaǵy 19 komanda qatysty. Tilshiler arasynda dop dodasy tań atqannan, qas qaraıyp, kún batqanǵa deıin ótti. Bul synǵa «Egemen Qazaqstan» gazetiniń komandasy da qatysty. Alǵashqy eki orynǵa jaıǵasqan úzdikter shırek fınalda kezdesti. Sonyń ishinde «egemendikter» D tobynda eki oıynda teń túsip, bireýin jeńip, shırek fınalǵa deıin jetti.
Aıan ÁBDÝÁLI,
«Egemen Qazaqstan»
Al fınalda «Habar-Almaty» «Almaty quramasynan» basym túsip, jeńimpaz atandy. «Almaty quramasy» osylaısha, ekinshi orynǵa ıelik etse, Ońtústik Qazaqstan jýrnalısterinen quralǵan komanda úshinshi oryndy mise tutty.
Aıta keterligi, «Habar-Almaty» alǵash ret týrnırdiń jeńimpazy atandy. Al Ońtústik Qazaqstannan kelgen komanda úshinshi jyl qatarynan qola júldege ıe boldy.