Eki kúnge sozylǵan elorda toıynan entigimizdi endi ǵana basqandaımyz. San túrli saltanatty sharalar, keremet keshter, kóńildi konsertter, bári-bári osy toıdyń joǵary dárejede ótýi úshin jasalǵan jobalar. Aıtýly kúnder aıaqtalǵanymen, estelikteri eskertkish bolyp sanamyzda sap túzeri sózsiz. Bıylǵy Astana kúnin asyǵa kútkenderdiń qataryna OQO, Ordabasy aýdany, Kókaral aýylynyń oqýshylaryn qosýǵa bolady.
О́tken jyly atalǵan aýylda respýblıkalyq bıýdjet esebinen salynǵan 300 oryndyq mektep paıdalanýǵa berilgen-di. Jańa bilim ordasy oqýǵa qajetti qural-jabdyqtarmen qamtamasyz etildi. Atap aıtsaq, kompıýter kabıneti men ınteraktıvti taqta jáne oqýshylardy eńbekke baýlıtyn arnaıy kabınetter bar. Zamanaýı talaptarǵa saı jabdyqtalǵan oqý oshaǵynyń ashylýy aýyl jurtyn qýantyp qana qoımaı, sonymen qatar, keleli keleshekke degen senimderin arttyra túskendeı. Atalmysh mekteptiń ashylý saltanatynda shákirtterdiń úkilegen úmitterin odan ári jigerlendirý maqsatynda sol aýyldyń túlekteri aǵaıyndy Myrzabek, Bababek jáne Jarqynbek Kýjımovtar syılyq retinde úzdik oqyǵan 12 oqýshy men úzdik 3 muǵalimdi Astana kúni qarsańynda elordamyzda tegin qonaq qylýǵa ýáde bergen bolatyn. Ýádeniń aty ýáde. Oryndasań saýap. Biraq, sharýasyn shardaı domalatqan azamattar úshin on bes adamdy qydyrtý, jatar orynǵa jaıǵastyrý, arý qalany aralatý asa qıyndyq týǵyzbaǵan sııaqty. Onyń ústine, óz aýylyńnyń týmalary bolsa bólek áńgime tipten.
Sonymen, júrdek poıyzdyń júgenin bosatyp, shyraıly «Shymqaladan», araıly Astanaǵa kórikti kósh keldi. Eki kúnge josparlanǵan serýendi sergek, qyzmetti qyzyqty atqarý úshin eki avtobýs ta daıyn tur. Jol kórsetýshi jandar da ázir. Alǵashqy kúni «Báıterekke» bas suǵyp, Ulttyq mýzeıge úńilip, «Dýman» oıyn-saýyq ortalyǵyna jol alyp, sońynda keshki Astananyń keremetterine kýá boldy.
«Elimizdiń júregi, arman qala Astanany kórý biz úshin arman bolatyn. Búgin, mine, Astananyń ǵajap jerlerin kórip keremet áser aldyq. Ol úshin Myrzabek aǵamyzǵa aıtar alǵysymyz sheksiz. Osyndaı ıgi sharany uıymdastyrǵan Myrzabek aǵamyzdy Ordabasy aýdanynyń ákimi Almasbek Keńesbekuly jáne bilim bóliminiń basshysy Maıhan Ydyrysuly «Alǵys hatpen» marapattady. Bul da azamattyń eńbegin baǵalaý shyǵar. Ásem qala Astanamyz kórkeıe bersin. El qamyn oılaıtyn Myrzabekteı aǵalar kóp bolsyn», – dedi atalmysh mekteptiń muǵalimi Baıan Sarıeva.
Urpaqtyń bolashaǵyna ulttyń árbir azamaty jaýapty emes pe. Bul oraıda Kókaral aýyly azamattarynyń atqarǵan isin kózge ilmeı ketýge áste bolmas. Sebebi, qazir sadaqa bermeıtin sarańbaılar kóbeıgen zaman boldy ǵoı. Al solarǵa óz aqshasyn qıyp turyp, aýyldastaryn jıyp turyp, dúnıeden azamattyqty bıik qylyp kórsetetin osyndaı jigitter úlgi bolýy kerek.
«Men Astanaǵa kelgenime qýanyshtymyn. Biz alǵashqy kúni Esilge jol tarttyq. Erke Esildiń jaǵasynda Astana gúldeı qulpyryp, jaınap turdy. Sodan keıin Báıterekke bardyq, Báıterekte Elbasymyzdyń qoltańbasyna qolymdy qoıǵanda, boıymdy erekshe sezim bıledi. Ulttyq mýzeıge kirgende birden kózimizge altyn sharlardan quralǵan qyran jáne kún ottaı basyldy. Bul bizdiń ulttyq rámizderimizdi beınelep turdy. Sodan soń biz arnaıy shoý kórsetilimine qatystyq. Mýzeıde qazaq halqynyń damý kezeńderin túgel aralap, elimizdiń tarıhyn kózben kórgendeı áser aldyq. Mýzeıden soń «Dýman» oıyn-saýyq keshenine bardyq. Ondaǵy túrli balyqtar, djýnglı álemi qorqynyshty bolǵanymen maǵan erekshe unady. Astana túnde kúndizgiden de jaınaı túsedi eken. Biz ony túngi Astanada qydyrǵan sátte sezindik. Astana – armandar oryndalatyn qala. Men Astanaǵa kelesi jyly qaıta kelýge úmittimin», – deıdi M.Jumabaev atyndaǵy jalpy orta mekteptiń 11-synyp oqýshysy Qundyzaı Qudaıbergen.
Raýan QAIDAR,
«Egemen Qazaqstan»
Astana