Osyndaı poshta markasy shyqty
«Qazposhta» aksıonerlik qoǵamy qazaqstandyq boksshy Gennadıı Golovkınge arnalǵan bes markadan turatyn poshtalyq toptamany aınalymǵa shyǵardy.
– Álemge áıgili boksshylarymyzdyń biri bizdiń poshta markalarymyzǵa shyǵaryldy. Gennadıı Qazaqstan boksyn nasıhattaý úshin, elimizdi tórtkúl dúnıege tanymal etý úshin óte kóp dúnıeler jasady, – dedi basqarma tóraǵasy Baǵdat Mýsın.
Poshta markalarynyń nomınaldary – «A» lıterleri 121 teńge, salmaǵy 20 gramǵa deıingi zańdy tulǵalarǵa arnalǵan jerústi kóligimen tasymaldanatyn qalypty hatty jiberýge arnalǵan tarıfke sáıkes keledi. «V» lıterleri – 200 teńge, 20 gramǵa deıingi jerústi kóligimen TMD elderine tasymaldanatyn qalypty hatty jóneltýge arnalǵan, «S» lıterleri – 218 teńge, salmaǵy 20 gramǵa deıingi jerústi kóligimen Qazaqstan aýmaǵy boıynsha tasymaldanatyn qalypty hatty jóneltýge jaraıdy.
Aıta keteıik, Gennadıı Golovkın – orta salmaq dárejesinde WBA, WBC, IBF jáne IBO tujyrymdary boıynsha álem chempıony. Ol 10 qyrkúıek kúni London qalasynda brıtanııalyq Kell Brýkpen kezekti jekpe-jegin ótkizedi. Qazaqstandyq boksshy osyǵan deıin ótkizgen 35 kezdesýiniń bárinde jeńiske jetip, olardyń 32-in nokaýtpen aıaqtaǵan. Al 30 jastaǵy brıtanııalyqtyń enshisinde 36 jekpe-jek. Bárinde qarsylastaryn utyp, 25-in ýaqytynan buryn aıaqtaǵan.
Aıan ÁBDÝÁLI,
«Egemen Qazaqstan»