Jetisýlyq bıznesmender bıznesin órge domalatyp qana qoımaı, qoǵamnyń rýhanı tárbıesine úles qosýda. Aıtalyq, jazıraly Jarkenttiń kásipkerleri Dilmurat Kózıev, Serik Aqsýbaev jáne Tasqyn Japarqul jańa meshit qurylysyna 1 mln. AQSh dollary kóleminde qarajat saldy. Qurylys 2015 jyly bastalyp, taıaýda ǵana aıaqtalyp, qasıetti juma kúni paıdalanýǵa berildi. Sáýletti qurylys qasıetti oryn ǵana emes kórnekti mádenı nysanǵa aınaldy. Meshitke 1000 adam syıady. Irgesinde 50 balaǵa arnalǵan medrese de paıda bolyp, 1,5 gektar jerde balalar alańy boı kótermek.
Meshittiń ashylý saltanatyna Qazaqstan musylmandary dinı basqarmasynyń basshysy, bas múftı Erjan Malǵajyuly qatysyp, kásipkerlerge ıgilikti isi úshin alǵys aıtty.
– Jarkentte jańadan ashylǵan meshit Almaty oblysyndaǵy 425-shi meshit boldy. Kásipkerlerimiz birinshi Allanyń, sosyn aýyldastarynyń aldyndaǵy paryzyn óteý úshin óz qarajattaryn jumsady. Qaıyrymdylyq tanyta otyryp, aýyl adamdarynyń tilegin oryndady. Bul nysandar óskeleń urpaqty ýaqyt talabyna saı bilim alýǵa, Otandy súıýge tárbıelese degen basty maqsatymyz bar, – deıdi Almaty oblysy boıynsha kásipkerler palatasynyń dırektory Lázzat Shyńǵysbaeva.
Nurbol ÁLDIBAEV,
«Egemen Qazaqstan»
Almaty oblysy,
Panfılov aýdany