Almatyda júrgizýshi múmkindigi shekteýli avtojúrgizýshiler turaǵyna kólik qoıǵany úshin 100 myń teńgeden asa aıyppul tóleýge májbúr boldy.
Jýyrda ǵalamtor betterinde qymbat 2 avtomobıldiń múgedek júrgizýshilerge arnalǵan avtoturaqta turǵan sýreti jaryq kórip, qoǵamda keńinen talqyǵa túsken edi. El aýzyna ilikken másele qalalyq tártip saqshylaryna da jetip, olar kólik ıeleri týraly tekseris júrgizgen. Zańǵa qaıshy áreket jasaǵan olardyń biriniń ústinen ákimshilik quqyq buzý faktisi boıynsha is qaralyp, 591-baptyń 4-tarmaǵy boıynsha 50 aılyq eseptik kórsetkishke saı, 106050 teńge aıyppul salyndy.
– Múmkindigi shekteýli jandarǵa arnalǵan avtoturaqta turǵan qos kóliktiń biri – «Aýdı» markaly avtomobıl zańdy tulǵanyń atyna tirkelgen eken, kólik ıesi bizge óziniń II toptaǵy múgedek ekendigin rastaıtyn qujatyn kórsetti. Demek, onyń tarapynan zań buzý faktisi tirkelmegen. Al «Mersedes» kóliginiń ıesi óziniń zań buzǵanyn moıyndap, ákimshilik quqyq buzý aıasynda aıyppul tóleýge mindetteıtin zań erejesine qarsylyǵy joq ekendigin málimdedi, – dedi qalalyq ishki ister basqarmasy jergilikti polısııa qyzmetiniń basshysy, polısııa podpolkovnıgi Jasulan Baıkenov.
Jergilikti polısııa qyzmetkerleri qala turǵyndarynyń ǵalamtor betinde zań buzýshylyqqa qarsy ashyq pikir bólisýleri nazardan tys qalatyn quqyq buzýshylyqtardy áshkere etetindigin aıtyp, qala tártibi men zań talabynyń saqtalýyna qosqan úlesteri úshin óz alǵysyn bildirdi.
Qanat ESKENDIR,
«Egemen Qazaqstan»
ALMATY