Búgin Qazaqstan Respýblıkasynyń Premer-Mınıstri Kárim Másimovtiń Mońǵolııaǵa sapary bastalady.
Aldymen eldiń Baıan-О́lgıı aımaǵyna taban tireıtin Úkimet basshysy Prezıdent Nursultan Nazarbaevtyń tapsyrmasymen jergilikti qandastarǵa kezdesip, selden zardap shekken otbasylarǵa gýmanıtarlyq kómek kórsetýge qatysady dep kútilýde.
Baıan-О́lgıı qazaqtaryna Qazaqstan tarapynan gýmanıtarlyq kómek beriletini jaıynda keshe Premer-Mınıstr óziniń tvıtterdegi paraqshasynda jazǵan bolatyn.
Aıta ketý kerek, 10 shilde kúni negizinen qazaqtar qonystanǵan Baıan-О́lgıı aımaǵynda sel júrip, 100-den asa úı qırap, 700-deı adam baspanasyz qalǵan edi.
Budan keıin Úkimet basshysy bıyl qurylǵanyna 20 jyl tolǵan ASEM («Azııa-Eýropa» forýmy) uıymynyń 11-shi sammıtine qatysý úshin Ulan-Batyr qalasyna ushyp ketedi.
«Egemen-aqparat»