Almaty oblysynda sý janjaly asqynyp tur. Sebebi, Kóksý aýdanynda sý durys bólinbegendikten alqaptardaǵy jekelegen jer telimderine sý jetpeı, aǵyn sý bosqa rásýa bolýda. Sonymen qatar, atalǵan aýdanda sý quny tym joǵary – tekshe metri 0,51 teńge turady. Al kórshi aýdandarda bul baǵa tómen. Sý jetkizý shyǵyndarynda aıyrma joq. Sondyqtan, Kóksý aýdanynyń kásipkeri Nıkolaı Brýsenskıı jáne «Qaırat» sharýa qojalyǵy basshysy Arǵynǵazy Saıerdenov, «Úmit» SATK tóraıymy Svetlana Lomova «Biz júrgizilip jatqan tarıf saıasatynyń sebebin túsine almaı otyrmyz.
Bizdiń aýdan ózen boıynda ornalasqanymen sý aqysyn nege qymbat baǵamen tóleımiz? Sý bóletin kásiporyn arnalardy sýmen tolyq qamtamasyz etý jónindegi kelisimsharttaǵy mindettemesin nege oryndamaıdy? Aýylsharýashylyq daqyldaryna sý jumsaý normalaryn qaıta qaraý qajet. Bizdiń janaıqaıymyzdy eshkim tyńdamaıdy, qulaq túrmeıdi», dep birqatar shyndyqtyń betin ashyp, «Qazaq sý sharýashylyǵy» memlekettik kásiporny jumysyna narazylyq tanytýda.
Bul máseleni «Qazaq sý sharýashylyǵy» RMK dırektorynyń orynbasary Qalybek Qudaıbergenov sýlandyrý salasynda bilikti mamandardyń jetispeýshiligin, Kóksý aýdanyndaǵy mekemeler balansqa alynbaǵandyqtan ótken jyly bólingen 570 000 teńge barlyq sýlandyrý júıeleri men sý arnalaryn qaıta qalpyna keltirýge jetpegenin aıtqanymen, jınalysqa qatysýshylardyń kóńilin kónshitpedi.
«Kásipkerler quqyǵyn qorǵaý boıynsha salalyq tekserý júrgizemiz. Tabıǵı monopolııalardy retteý jáne básekelestikti qorǵaý departamentine Kóksý aýdanyndaǵy sý baǵasyna qatysty tarıftik saıasatty túsindirýdi talap etemiz», deıdi oblystyq kásipkerler palatasynyń basshysy L.Shyńǵysbaeva.
Al ózen boıynda sý tapshylyǵyn tartyp otyrǵan jandarǵa bılik qandaı ýáj aıtar eken?
Nurbol ÁLDIBAEV,
«Egemen Qazaqstan»
Almaty oblysy,
Kóksý aýdany