Qazaqstan Premer-Mınıstri Kárim Másimov 12 tamyzda Sochıde ótetin EAEO elderi úkimet basshylarynyń otyrysyna daıyndyq máseleleri boıynsha keńes ótkizdi.
Sochıdegi keńes týraly sheshim 2016 jylǵy mamyrda saýda, kedendik yntymaqtastyq, ekonomıka jáne qarjy saıasaty, energetıka jáne ınfraqurylym salalaryndaǵy ózara is-qımyl máseleleri jónindegi Eýrazııalyq úkimetaralyq keńes otyrysynda qabyldanǵan bolatyn.
Keńeıtilgen quramda ótken mamyrdaǵy keńeste sóılegen sózinde Úkimetaralyq keńes tóraǵasy – Qazaqstan Respýblıkasynyń Premer-Mınıstri K.Másimov tóraǵalyqtyń basymdyqtary retinde Qazaqstan 2016 jyldy EAEO-tyń úshinshi eldermen jáne basty ıntegrasııalyq birlestiktermen ekonomıkalyq qarym-qatynastaryn tereńdetý jyly dep jarııalaýdy usynǵanyn eske saldy. Osyǵan baılanysty taraptar Úndistan, Izraıl, Mysyr, Iran jáne basqa da eldermen erkin saýda aımaǵyn qurýdyń maqsattylyǵyn zertteýde.
«Ekonomıkalyq damyǵan jáne ınvestısııalyq tartymdy eldermen jáne birlestiktermen yntymaqastyqqa basa nazar aýdarý qajet. Qazaqstan tarapy ıntegrasııalyq úderisterdi bizdiń elder úshin Shyǵys pen Batys arasyndaǵy baılanystyrýshy býynǵa, álemdik ekonomıkanyń básekelestik quraýshysyna aınalý múmkindigi retinde qarastyrady», – degen bolatyn sol kezde K. Másimov.
EAEO elderi úkimet basshylarynyń aldaǵy keńesinde ekonomıkalyq ıntegrasııanyń mańyzdy máseleleri qaralyp, onyń ishinde EAEO Keden kodeksin qabyldaýdyń sońǵy merzimderi týraly másele sheshildi.
EAEO Keden kodeksi, sondaı-aq, odaqtyń odan ári damýynda mańyzdy mánge ıe basqa da birqatar qujattardy kelisý 12 tamyzda Sochıde jáne 28 qazanda Mınskide ótetin Úkimetaralyq keńes otyrystarynda aıaqtalady delinýde.
«Egemen-aqparat»