Metallýrgter qalasy Temirtaýda ylǵı mergender turady ma dersiń?! Álgiler alystan turyp atqanda qoladan quıylǵan Lenınniń júrek tusynan dál tıgizetin kórinedi...
Qaladaǵy «Eńbek dańqy» dep atalatyn burynǵy saıabaqta bir top buzaqynyń osynda turǵan Lenın eskertkishin atqylap jatqanyn ıt qydyrtyp júrgen bir áıel kórip qalypty. «Páleden mashaıyq qashypty» degen, áıel álgi jerden ıtin súıreı qashqan eken.
Erteńinde qaıtyp kelip, kún kósemniń eskertkishin anyqtap qarasa, músinniń keýde tusynan tıgen birneshe oqtyń izin baıqapty. Sodan keıin ol óziniń kórgen-bilgenin jýrnalısterge aıtyp bergen. Qazirgi ýaqytta budan polısııa qyzmetkerleri de habardar bolypty.
Eske salsaq, Temirtaýdaǵy Lenın eskertkishiniń qala turǵyndarynan kórip otyrǵan quqaıy jalǵyz bul emes. Máselen, 2012 jyly belgisiz bireýler kósem kıgen qola paltonyń shalǵaıyn kesip áketken bolatyn.
Negizi eskertkish tarıhı qundylyqtar tiziminen alynyp tastalǵan eken. Sol sebepti ony ustap turýǵa bıýdjetten qarjy qarastyrylmaǵan. Al oqıǵa oryn alǵan saıabaq qazirgi ýaqytta polısııa jasaǵy júretin nysandar qatarynan alynyp tastalǵan kórinedi...
Qaırat ÁBILDINOV,
«Egemen Qazaqstan»
Qaraǵandy oblysy,
Temirtaý qalasy