[caption id="attachment_54447" align="aligncenter" width="560"] akorda.kz[/caption]
Qazaqstan Prezıdenti Ulttyq bank tóraǵasy Danııar Aqyshevty qabyldady.
Akorda.kz-tiń málimeti boıynsha, kezdesý barysynda D.Aqyshev Memleket basshysyna Ulttyq banktiń qazirgi qyzmeti, aqsha-nesıe saıasatynyń basty baǵyttary týraly, sonymen qatar eldiń qarjy naryǵyndaǵy ahýal týraly baıandady.
Elbasy ishki valıýta naryǵyndaǵy jaǵdaıdy turaqtandyrýdy qamtamasyz etý, respýblıkanyń bank júıesin damytý jáne ekinshi deńgeıli bankter arqyly ekonomıkany nesıelendirý kólemin arttyrý jóninde tıisti sharalar qabyldaý qajettigine nazar aýdardy.
Nursultan Nazarbaev sondaı-aq, teńge baǵamyna baılanysty jaǵdaıǵa qatysty tıimdi aqparattyq-túsindirý jumysyn jalǵastyrýdyń mańyzdylyǵyn atap ótti.
«Erkin aıyrbas baǵamyn engizý týraly sheshim durys boldy. Alaıda, qazir keıbir keleńsiz jaǵdaılar oryn alýda jáne onyń sebepterin jurtqa túsindirý qajet», – dedi Memleket basshysy.
Ulttyq banktiń tóraǵasy ulttyq valıýtanyń dollarǵa qatysty baǵamynyń álsireýine áser etken faktorlar jóninde aıtty.
«Bıylǵy alǵashqy alty aıda munaı baǵasy barreline 27-den 52 dollarǵa qymbattady, alaıda, shildede 52-den 42 dollarǵa –15 paıyzǵaǵa arzandady. Barlyq shıkizat eksporttaıtyn damýshy elderde osyndaı jaǵdaı oryn aldy. Olardyń ulttyq valıýtalary Qazaqstandaǵy sııaqty bekip, keıinnen 2-3 paıyzǵa tómendedi. Shildede teńge shartty túrde 4,2 paıyzǵa álsiredi, bul qalypty ózgeris dep sanaımyz. Qazirgi ýaqytta jaǵdaı turaqtady. Aldaǵy ýaqytta baǵam qandaı da bir jaǵdaılarǵa baılanysty ózgere qoımaıdy. 2016 jylǵy shildedegi teńgeniń erkin aıyrbas baǵamy jaǵdaıyndaǵy aýytqýy ishki ekonomıkalyq turaqtylyq úshin eshqandaı qaýip tóndirmeıdi», – dedi D.Aqyshev.
Budan bólek, Ulttyq banktiń tóraǵasy eldegi ınflıasııa úderisterin ustap turý úshin júrgizilip jatqan jumystar týraly málimdedi.
«Jyl basynan bastap ınflıasııa ósimi 5,2 paıyzdy qurady. Osy kórsetkishte 2015 jylǵy qyrkúıek-qarasha aılarynda baǵa tez ósken kezeńdegi baǵamdy túzeýdiń áseri qamtylǵan. Bul endi artta qaldy. Jyldyń qorytyndysy boıynsha biz Úkimet kózdegen 6-8 paıyz ınflıasııalyq dálizdi qamtamasyz etemiz degen senim bar», – dedi ol.
Memleket basshysy kezdesý qorytyndysy boıynsha birqatar tapsyrma berdi.
Aıdar О́RISBAEV