Alańdatqan indettiń aty belgili boldy

Atyraýda sıyrlardyń belgisiz indetke shaldyqqany týraly «Aty joq indet» («Egemen Qazaqstan» gazeti, №141, 26 shilde) degen taqyryppen dabyl kótergenbiz. Veterınarlyq baqylaý jáne qadaǵalaý komıteti Atyraý oblystyq aýmaqtyq ıns­peksııasy basshysynyń orynbasary Sulýhııa Bısenovanyń málim etkenindeı, dál qazir indettiń dıagnozy qoıyldy. Qurmanǵazy aýdanynda aýyrǵan maldyń birnesheýinen alynǵan bıologııalyq synamalar Reseı Federasııasynyń Vladımır qalasyndaǵy Referenttik zerthanaǵa da joldanypty. Atalǵan zerthananyń qorytyndysyna sáıkes nodýlıarly dermatıt vırýsy anyqtalyp otyr. Osyǵan oraı oblys ákimi Nur­lan Noǵaev aýrý belgileri anyq­talǵan Qurmanǵazy men Isataı aýdandary, sonymen birge, Atyraý qalasynyń Damby, Keńózek aýyl­dyq okrýgteriniń aýmaǵyna karantın engizdi.  Mundaı is-sharany qolǵa alýǵa  nodýlıarly dermatıt vırýsymen Qurmanǵazy aýdanynda – 2267, Isataı aýdanynda – 326, al Atyraý qalasynyń irgesindegi okrýgterde 24 sıyrdyń aýyrýy sebep bolyp otyr. – Bul aýrý Qazaqstanda buryn-sońdy tirkelmegen ekzotıkalyq, ıaǵnı, syrttan kelgen aýrý. Onyń negizgi klınıkalyq belgileri mynadaı. Maldyń azyq qabyldaýynyń tómendeýi, kózinen jáne tynys joldarynan suıyqtyqtyń aǵýy, joǵary temperatýra,  moıyn, keýde, baýyry tusynda, jelininde, shabynda, basynda, teri astynda konsıstensııasy qatty bir­neshe túıinshek paıda bolady. Túıinshekterdiń dıametri 2 sm-den 5-11sm-ge deıin barady, bıik­tigi 0,2-0,5 sm. Keıbir malda sol túıinshekterdiń tinderi ólip, qaýdyrap túsip qala­dy. Lım­faýzelder  isip tura­dy. Mal tez aryqtaıdy. Maldyń sútin qy­zdyr­ǵanda gel sııaqty qoıý­lanyp qalady, – dep túsindirdi Sulýhııa Bısenova. Mamannyń pikirinshe, mun­daı aýrý 2014 jyly Reseıdiń Daǵystan, Cheshenstan jáne Kras­nod­ar aımaǵynda tirkelipti. Jel­diń baǵytymen masa, sona sııaqty qansorǵysh nasekom­dar qonys aýdaryp ushady.  Nasekom­dar aýrý maldan soń saý maldy shaqsa, atalǵan aýrý juǵady eken. Sol sebepten,  jergilikti vete­rı­nar­larǵa maldyń ústin tazalaý úshin dezınfeksııalyq dárilerdi 3 kún saıyn  shashýǵa  tapsyrma berilipti. Budan bólek, kreolın, lızol, skıpıdardy jáne  dıhlofos sııaqty úrkitetin ıisti dárilerdi de qoldanýǵa bolady eken. Osylaısha, óńir turǵyndaryn alańdatqan indettiń aty belgili boldy. Oblystyq aýmaqtyq ıns­pek­sııa basshysy Nurbaı Ábdi­rah­manovtyń málim etýinshe, 5 tamyzǵa deıin 4147 sıyrǵa nodýlıarly dermatıt juqqan bolsa, onyń 322-si ólgen.  О́kinishke qaraı,  elimizde atalǵan vırýsty indetke qarsy salynatyn ekpe joq bolyp shyqty. О́ńirde 5 karantın beketi ashyldy. Joldasbek ShО́PEǴUL, «Egemen Qazaqstan» ATYRAÝ