Súıinbaı Eralıevpen qoshtasý
Beınelep aıtsaq, halyq – alyp taý, al halyqtyń atyn qaıtalanbas has talantymen asqaqtatqan ulaǵaty mol uly tulǵalar – alyp taýdyń aqalabasyn kún súıgen aqbas shyńy. Tósekte basy, tóskeıde maly qosylǵan baýyrlas qyrǵyz halqynyń shyrqaý bıikte turǵan taǵy bir shyńy qulady – jaryq dúnıe deıtin opasyz jalǵanǵa qolyn bir siltep, Súıinbaı Eralıev ótti ómirden ...
Osydan úsh aı shamasy buryn Bishkekten telefon shalǵan qalamdas dosym, qyrǵyzdyń shoń aqyny Marhabaı Aamatov:
Súıinbaı baıeke keshe bizderge «endi sóıleı de almaspyn», Qazaqstandaǵy qazir jer basyp júrgen eki dosym Muzafar Álimbaev pen Sábıt Dosanov, men baqılyq bolǵanda habarlasarsyńdar, – dep bizderge ósıet aıtty. Búgin komada jatyr, – dep edi. Súıinbaı aǵa qazaq qalamgerimen tyǵyz qarym-qatynasta boldy. Ásirese, Syrbaı Máýlenovpen dostyǵy erekshe edi. Ekeýi biriniń jaýhar jyrlaryn biri aýdardy. О́tken ǵasyrdyń sekseninshi jyldary qyrǵyz ádebıetiniń Qazaqstandaǵy kúnderine qatysqan delegasııany Súıinbaı aǵa bastap keldi. Sol joly Qyzdar pedagogıkalyq ınstıtýtynda ótken ádebı keshti men júrgizip edim, sirá da esten ketpeıtin sol bir sáýleli sátte bastalǵan tanystyǵymyz kir shalmaǵan qylaýsyz dostyqqa ulasyp edi. 2006 jyly Bishkekte shyǵarmashylyq keshim ótkende de qoldaý kórsetip, aǵynan jarylyp, aq batasyn bergen aıaýly aǵa-dosym edi Súıekeń. Eń bastysy – qyrǵyz ben qazaqtyń dostyǵy nyǵaıa berýi úshin qalamymen de, qaıratkerligimen de talmaı qyzmet etti ol!
«Basynan árkimniń bul jalǵan óter» dep edi-aý Qoja Ahmet Iаsaýı. Sol jalǵannan qyrǵyz Alataýynyń bıik shyńy Súıinbaı Eralıev te ótti. Qyrǵyzstannyń Halyq batyry altyn juldyzy bastaǵan ataqtar da qaldy jalǵanda. Jalǵyz jubanysh – halyqpen birge jasaı beretin ádebı mol mura. «Tán kómiler, kómilmes etken isim» depti ulylardyń biri. Ulylar ultqa bólinbeıdi. Ulty – qyrǵyz, jany – qazaq Súıinbaı Eralıev baýyrlas halyqtardyń ortaq maqtanyshy bolyp keler urpaq, kemel tarıhpen birge jasaı beredi.
Qosh bol, qoshtasýǵa qımaıtyn aqylman, asyl aǵa!
Sábıt DOSANOV