fılmi Qytaı halyqaralyq kınofestıvalinde jeńimpaz atandy
Shyńjańda (Qytaı) Halyqaralyq mádenıet jáne kreatıvti ındýstrııa kórmesi aıasynda halyqaralyq kınofestıval ótti. Kınofestıval men sharaǵa qatysýshy memleketterdiń mádenıeti týraly kórmeni Qytaı Halyq Respýblıkasynyń mádenıet mınıstrligi uıymdastyrdy.
Kınofestıval baǵdarlamasynda qazylar alqasy nazaryna 78 fılm usynyldy. Rejısser Baqyt Qaıyrbekovtiń «Máńgilik aspan astynda» atty ǵylymı-tanymdyq fılmi «Innovasııalyq joba» atalymy boıynsha joǵary marapatqa ıe bolyp, Qytaı Halyq Respýblıkasy mádenıet mınıstrliginiń júldesin aldy.
Eske sala ketsek, «Máńgilik aspan astynda» fılmin Qazaqstan Respýblıkasy Mádenıet jáne sport mınıstrliginiń tapsyrysy boıynsha Qazaq ǵylymı-zertteý mádenıet ınstıtýty men «Mergen» stýdııasy túsirgen. Bul joba Nursultan Nazarbaevtyń «Ǵasyrlar toǵysynda» kitaby negizinde Qazaq handyǵynyń 550 jyldyq mereıtoıyna arnaıy daıarlandy.
Kınofestıvalǵa qatysýshylardyń ortaq pikiri boıynsha qazaqstandyq fılmder sheteldik kórermenderdiń tarapynan suranysqa ıe. Osy fılmder arqyly adamdar Qazaqstan halqynyń baı mádenıetimen, salt-dástúrlerimen tanysa alady.
Shyńjań Uıǵyr avtonomııaly aýdanynyń mádenıet departamenti dırektorynyń orynbasary Keńes Sanı: «Qazaqstandyq fılm kınofestıvaldyń laıyqty joǵary marapatyna ıe boldy. Fılm qazaq halqynyń mádenıeti men ómirin jańa turǵydan ashyp, kórmege kelýshilerdiń úlken qyzyǵýshylyǵyn týdyrdy. Biz budan bylaı eki el arasyndaǵy yntymaqtastyqtyń jemisti bolatynyna úmittenemiz».
Kórmeniń jumys istep turǵan ýaqytynda qazaqstandyq stendti myńdaǵan adam tamashalady.
«Egemen-aqparat»