Qazaqstannyń Qytaıdaǵy elshisi Shahrat Nuryshev QHR Syrtqy ister mınıstriniń kómekshisi Lı Hýeılaımen kezdesti, dep habarlady inform.kz
Kezdesý barysynda taraptar eki el arasyndaǵy saıası, ekonomıkalyq jáne mádenı-gýmanıtarlyq saladaǵy yntymaqtastyqtyń qazirgi jaı-kúıi men bolashaǵyn jáne eń joǵary deńgeıde qol jetkizilgen ýaǵdalastyqtardy júzege asyrý joldaryn talqylady.
Ásirese, bıyl qyrkúıek aıynda ótetin Qazaqstan Prezıdentiniń Qytaıǵa sapary jáne «G-20» sammıtine qatysýyna daıyndyq máselelerine erekshe nazar aýdaryldy.
«Nurly jol» jańa ekonomıkalyq saıasaty jáne Qytaı bastamasy «Jibek joly ekonomıkalyq beldeýiniń» toǵysýyn is júzinde júzege asyrý, eki el iske asyratyn Indýstrııalandyrý jáne ınvestısııalar baǵdarlamasyna qatysatyn kásiporyndar úshin qolaıly jaǵdaı týǵyzý jáne praktıkalyq yntymaqtastyqtyń jańa baǵyttaryn keńeıtý boıynsha baısaldy pikir almasý ótti.
Qazaqstandyq dıplomat elimiz aýmaǵynda birlesip júzege asyrylyp jatqan ınfraqurylymdyq jobalardyń mańyzdylyǵyna toqtaldy. Mysal retinde Astanadaǵy jeńil rels júıesiniń (LRT) qurylysyn atap kórsetti.
О́z kezeginde Lı Hýeılaı birlestik aıasynda odan ári tyǵyz yntymaqtastyqqa úmittenetinin bildirdi. Sondaı-aq Qytaı dıplomaty Eýrazııalyq ekonomıkalyq odaq pen Jibek joly ekonomıkalyq beldeýin ushtastyrýda Qazaqstannyń mańyzdy rólin atap ótti.
Sh. Nuryshev qytaılyq dıplomatqa jahandyq qaýipsizdikti qamtamasyz etýge qatysty Qazaqstannyń halyqaralyq bastamalary jóninde baıandady, sondaı-aq ony Semeı ıadrolyq synaq polıgonynyń jabylǵanyna 25 jyl tolýyna oraı 29 tamyz kúni ótetin is-sharaǵa qatysýǵa shaqyrdy.
Aıdar О́RISBAEV