Ǵylym kúni qarsańynda Aqordada ótken saltanatty jıynda Memleket basshysy Qasym-Jomart Toqaev eldiń zııatkerlik áleýetin damytýǵa úles qosyp júrgen bir top ǵalymdy marapattady. Olardyń qatarynda hımııa men jasandy ıntellekt salalaryn ushtastyryp júrgen doktor PhD, QR Ulttyq ǵylym akademııasy janyndaǵy Jas ǵalymdar keńesi tóralqasynyń múshesi Asııa Ermýhambetova bar, dep habarlaıdy Egemen.kz.
«Emosııalar óte kúshti boldy. Bizdi Aqordaǵa kirgen sátten bastap joǵary deńgeıde qarsy aldy. Bul – úlken jaýapkershilik. Ǵalym retinde eńbegimizdiń osylaı baǵalanýy – úlken senim», dedi ol.
Marapattaý rásimi Ǵylym kúni qarsańynda ótti. Bul – ǵylymı qaýymdastyq úshin erekshe mańyzdy kezeń.
«Konstıtýsııaǵa engizilgen ózgeristerden keıin ǵylymnyń mártebesi artty. Endi memleket ǵylymǵa burynǵydan da joǵary deńgeıde kóńil bólip otyr», dedi ǵalym.
Asııa Ermuhambetovanyń ǵylymǵa qyzyǵýshylyǵy mektep kezinen bastalǵan. Hımııa páni muǵalimi onyń ǵylymı baǵytqa bet burýyna túrtki bolǵan.
Ol keıin Satbayev University-de bilim alyp, «Bolashaq» baǵdarlamasymen University College London ýnıversıtetinde PhD dárejesin qorǵaǵan. Búginde jas ǵalym Qazaqstandaǵy ǵylymı ortaǵa da belsendi úles qosyp keledi.
Onyń bastamasymen 400-den astam zertteýshini biriktiretin Jas ǵalymdar alıansy qurylǵan.
Qazirgi ýaqytta ǵalymdar toby hımııa men jasandy ıntellektti ushtastyra otyryp, jańa materıaldardy zertteýmen aınalysady.
«Biz qazir jasandy ıntellekt ádisterin qoldana otyryp, materıaldardy zertteý ústindemiz. Bul tájirıbelerge ketetin ýaqytty qysqartýǵa jáne elektrodtar úshin ońtaılandyrylǵan mıkroqurylymdardy alýǵa múmkindik beredi. Negizgi maqsat – tehnologııalar kómegimen ǵylymı jańalyqtardy jyldamdatý jáne olardyń dáldigin arttyrý», dep túsindirdi Asııa Ermýhambetova.
Mundaı zertteýler ǵylym men óndiristiń damýyna jańa serpin berip, ınnovasııalyq tehnologııalardy jedeldetýge jol ashady. Mamandardyń aıtýynsha, bul Qazaqstan ǵylymynyń jańa deńgeıge kóterilýiniń aıqyn kórinisi.
Eske sala keteıik, búgin Prezıdent jıynda joǵary memlekettik marapattar tizimine «Ál-Farabı» ordeni engiziletinin málimdep, qazaqstandyq ǵalymdardy marapattady. Al bir top jas ǵalymǵa páter kiltterin tabystady.