Qazaqstanda qalyptasqan myqty matematıkalyq mektep kompıýterlik ǵylymdardyń damýyna da negiz bolyp otyr. Bul týraly Astana IT ýnıversıtetiniń Jasandy ıntellekt jáne ǵylymı-ınnovasııalyq ortalyǵynyń dırektory, assıstent professor Beıbit Ábdiken BAQ.KZ tilshisine bergen suhbatynda aıtty, dep habarlaıdy Egemen.kz.
Sońǵy jyldary elimizde ǵylym salasy, ásirese jasandy ıntellekt baǵyty qarqyndy damyp keledi. Bul tehnologııany túrli salalarda qoldanýǵa baǵyttalǵan naqty jobalar júzege asyrylyp jatyr.
Ǵalymnyń aıtýynsha, bul damýdyń negizi – matematıka.
«Qazaqstanda myqty matematıkalyq mektep qalyptasqan, al sonyń negizinde kompıýterlik ǵylymdar da damyp keledi. Sonymen qatar jaqynda ashylǵan iri data-ortalyqtar jasandy ıntellekt jobalaryn júzege asyrýǵa úlken múmkindik berip otyr. Sondyqtan elimizde jasandy ıntellekt salasy jaqsy deńgeıde damyp keledi dep aıtýǵa tolyq negiz bar», deıdi Beıbit Ábdiken.
Jas ǵalym Asııa Ermýhambetova «Eren eńbegi úshin» medalimen marapattady
Ǵalymnyń ǵylymdaǵy jalpy eńbek ótili – 12 jyl. Ol Memleket basshysynyń Jarlyǵymen «Eren eńbegi úshin» medalimen marapattaldy.
Ábdikenniń negizgi zertteý baǵyty – jasandy ıntellekt jáne onyń túrli salalarda qoldanylýy. Ǵylymı dıssertasııalyq jumysy qaterli isikti boljaýdyń matematıkalyq modeline arnalǵan.
«Negizgi ǵylymı baǵytym – jasandy ıntellekt jáne onyń túrli salalarda qoldanylýy. Ǵylymı dıssertasııalyq jumysym qaterli isikti boljaýdyń matematıkalyq modeline arnalǵan. Qazirgi ýaqytta da osy baǵyttaǵy zertteýlerdi jalǵastyryp kelemiz. Sonymen qatar neıroǵylym, ıaǵnı mıdyń sıgnaldaryn taldaý jáne boljaý boıynsha jobalarmen de aınalysamyz», deıdi ol.
Professor memleket tarapynan kórsetilip jatqan qoldaý men qurmet ǵylym salasynyń damýyna oń áser etetinin atap ótti.
«Búgingi alyp otyrǵan marapatymyz biz úshin óte mańyzdy. Bul – ǵalymdardyń eńbegi elenip, ǵylymnyń el úshin mańyzy joǵary ekenin kórsetedi. Aldaǵy ýaqytta da iri ǵylymı jobalardy júzege asyryp, olardyń nátıjesi el ıgiligine qyzmet etedi dep senemiz», deıdi ol.
Beıbit Ábdikenniń aıtýynsha, aldaǵy ýaqytta da jańa ǵylymı nátıjelerge qol jetkizip, jasandy ıntellekt salasyndaǵy zertteýlerdi odan ári damytý josparlanyp otyr.
Eske sala keteıik, búgin Prezıdent jıynda joǵary memlekettik marapattar tizimine «Ál-Farabı» ordeni engiziletinin málimdep, qazaqstandyq ǵalymdardy marapattady. Al bir top jas ǵalymǵa páter kiltterin tabystady.