Ulttyq akademııalyq kitaphanada Qazaqstan Respýblıkasynyń eńbek sińirgen ǵylym qaıratkeri, Halyqaralyq joǵary mektepter ǵylymı akademııasynyń qurmetti akademıgi, fılologııa ǵylymdarynyń doktory, professor Tursynbek Kákishevtiń jeke kitaphanasy – «Ǵalym» zaly ashyldy. Osy shara aıasynda «Maǵjan – Sáken» kitabynyń tusaýy kesildi.
Izgilikke toly is-sharaǵa Mádenıet jáne sport mınıstri Arystanbek Muhamedıuly, Parlament Senaty men Májilisiniń depýtattary, elimizdiń zııaly qaýym ókilderi qatysyp, ǵalym jaıly estelikterimen bólisti.
О́tken jyly ómirden ozǵan ǵalymnyń jeke kitaphanasynda gýmanıtarlyq ǵylymdar boıynsha bes myńǵa jýyq kitap, sondaı-aq belgili jazýshylar Sáken Seıfýllın, Sábıt Muqanovtyń ómiri men qyzmetine qatysty qundy muraǵattyq qujattar bar. Ǵalymnyń qoljazbalary men basqa da materıaldarynan quralǵan 83 papka qujat kitaphanaǵa tartý etildi.
Tursynbek Kákishevtiń jeke kitaphanasynyń tabystalýy – Ulttyq akademııalyq kitaphananyń taǵylymǵa toly dástúriniń jalǵasy, kitaphana qoryn baıyta túsýdegi mańyzdy qadam deýge bolady. Tursynbek Kákishevtiń jeke kitaphanasynyń ashylýyna ǵalymnyń jubaıy, fılologııa ǵylymdarynyń doktory, professor Kúlásh Sadyqqyzy Ahmet muryndyq boldy.
Raýan QAIDAR,
«Egemen Qazaqstan»