Rıo-de-Janeıro qalasynda ótken XXXI Jazǵy olımpıada oıyndarynda qola júlde alǵan qaraǵandylyq balýan qyz Elmıra Syzdyqovaǵa jerlesteriniń peıili erekshe. Budan sál buryn oblys ákimi Nurmuhambet Ábdibekov sportshyǵa Toyota Camry avtokóligin syıǵa tartqan bolatyn.
Al taıaýda grek-rım, erkin jáne áıelder kúresi federasııasy Qaraǵandy oblystyq fılıalynyń tóraǵasy Asylbek Dúısebaev Olımpıada júldegerine Toyota Corolla markaly avtokóliktiń kilti men 1 mıllıon teńgeniń sertıfıkatyn tabys etti. Elmıranyń jeke bapkeri de nazardan tys qalmady. Federasııa atynan Vladıslav Sýtormın 3 000 000 teńgemen marapattaldy.
Balýan men onyń bapkerin marapattaý rásimine sport ardagerleri men qaıratkerleri, Nurǵazy Jarylǵapov, Aleksandr Mysık jáne Iosıf Momselıdze syndy eńbek sińirgen jattyqtyrýshylar qatysty. Olar Elmıra Syzdyqovany tamasha tabysymen quttyqtap, jańa bıikterdi baǵyndyrýyna tilektestik bildirdi.
Qaırat ÁBILDINOV,
«Egemen Qazaqstan»
QARAǴANDY