Qaýipsizdigimizdi qas qaqpaı kúzetedi

Elimizdegi Ulttyq qaýipsizdik komıtetiniń ókilderi ózderiniń terrorızm men dinı ekstremızmge qarsy kúres baǵytynda atqarǵan jumystarynyń nátıjesin málimdedi. BAQ ókilderine arnalǵan baspasóz máslıhatyna Terrorızmge qarsy barlaý shtaby ortalyǵynyń bastyǵy Janat Saıpoldaev pen osy ortalyqtyń ókili Sáken Myńbaev qatysqan bolatyn. Mamandar jyl basynan beri beıbit eldiń berekesin qashyryp, qalyń buqarany úreı qushaǵynda qaldyrǵan atyshýly oqıǵalardyń jaı-japsaryn baıandap, taldaý jasady. Atap aıtqanda, aı men kúnniń amanyn­da otandastarymyzdy ári-sári kúıge túsirgen Aqtóbedegi terrorıstik shabýylǵa qatysty quzyrly organdardyń osy kúngi is júrgizý prosesi men segiz aıda sezikti dep tanylǵan adamdar­dy tekserip, tergeýdiń jáne jaýapqa tartýdyń qorytyndysy jarııalandy. Qoldaǵy derek boıynsha, jyl basy­nan beri ulttyq qaýipsizdik organdary ter­rorıstik jáne ekstremıstik qyl­mys jasaǵany úshin 57 radıkal kúdiktini ustaǵan. Al endi qaýipsizdik qyzmetiniń ókilderi qoǵam qaýipsizdigin qamtamasyz etýge qanshalyqty qaýqarly? Ábjil áreketke beıim komıtet mamandary «jaý ketken soń qylyshyn tasqa shappaýǵa» qabiletti me?!. Endigi oıdy osy másele tóńireginde órbitsek. Sala mamandarynyń radıkaldy toptar áreketiniń aldyn alýǵa qatysty usynǵan málimetterine kóz júgirtsek, olar sońǵy kezderi kóptegen búlikshiniń josparyn buzyp, atys-shabystyń aldyn alypty. Naqtylaı tússek, osydan eki juma buryn Batys Qazaqstan oblysynda 8 adamnan quralǵan top quryqtalǵan. Olar Aq­tóbe oqıǵasyndaǵy sekildi qarýdy ıemdený maqsatynda jergilikti quqyq qorǵaý organdarynyń bólimshe­si men arnaýly qyzmet, polısııa qyzmetkerlerine shabýyl jasaýdy josparlaǵan eken. Ustalǵandardy tintý nátıjesinde pnevmatıkalyq myltyq, qoldan jasalǵan pyshaq­tar, ártúrli aqparattyq negizdegi eks­tremıstik mazmundaǵy materıaldar alynǵan. Top músheleri halyqaralyq terrorıstik uıymdardyń tańbasyn qoldan jasap, ony úgit-nasıhat maqsatynda da paıdalanyp kelgen. Sol sııaqty, Ulttyq Qaýipsizdik komıteti ókilderiniń aıtýynsha, Almaty oblysynyń aýmaǵynda radıkaldyq bir toptyń Shekara qyzmeti men Qorǵanys mınıstrliginiń áskerı bólimderine, joǵary qyzmettegi kúshtik qurylymdardyń qyzmetkerleri­ne, Qazaqstan musylmandary dinı basqarmasynyń ókilderine qarýly shabýyl jasaýǵa nıettengendigi ásh­kerelenip otyr. Sonymen qatar, 18 tamyzda Qyrǵyzstan azamaty men buryn jalpy qylmys jasaǵany úshin sotty bolǵan eki Qazaqstan azamaty qamaýǵa alynǵan. Olar jıyn ótkizip top basshysyn saılap, ózge múshelerdiń rólin belgilegen. Tipti, top músheleriniń biri ózin ózi jarýǵa nıetti ekenin de bildiripti. Ol ol ma, ospadarlar ózderiniń aqylǵa qonym­syz osyndaı áreketterinen qoǵamdyq pikir týǵyzý úshin, adamdar kóp jınala­tyn oryndarda terrorıstik akt jasaý jolyn qarastyrǵan eken. Máselen, sondaı maqsatpen Taldyqorǵan qala­syndaǵy áýejaıǵa zerttep, barlaý júr­gizilgen. Túpki nıetteri 2001 jyl­dyń 11 qyrkúıeginde AQSh-ta bolǵan shabýyldarǵa uqsas aýqymdy ter­­ro­rıstik aktini júzege asyrý úshin aza­mat­tyq nemese áskerı ushaqty ur­lap áketý múmkindigin qarastyrǵan. Sonymen qatar, ınternet ar­qyly taralyp jatqan terrorıstik jáne ekstremıstik ıdeologııanyń yqpalymen Aqtóbe oblysynda 11 adamnan turatyn top radıkaldanǵany aıqyndaldy. Olar terrorıstik aktini jasaýdyń aldynda ózderi­niń áreketin dinı negizdemede túsin­diretin beınerolık jasaýdy jáne ony ınternetke ornalastyrýdy josparlaǵan. Ol azdaı, ashyq kúnde júrisinen jańylyp, adasqandar «qasıetti soǵysqa» daıyndyq júrgizip, óz aınalasynda radıkaldyq ıdeıalardy belsendi nasıhattaǵan. Oǵan qosa, sheteldegi terrorıstermen baılanysqa shyǵýdy da josparlaǵan. 29 tamyz kúni olardy tutqyndaý arqyly quqyq qorǵaý organdarynyń qyzmetkerine shabýyl jasaýdyń, onyń ishinde ózin ózi jaryp, Qazaqstan men Reseı aýma­ǵyn­da terrorıstik áreketterin júzege asyrýǵa jol berilmedi. Keıinnen, ustalǵandardyń qoımasynan nómiri óshirilgen 16 kalıbrli eki myltyq, oq-dáriler, tapansha, Kalashnıkov avtomatynyń mýlıajy, halyqaralyq terrorıstik uıymdardyń sımvolı­ka­sy jáne ekstremıstik materıaldar tabylǵan. Ulttyq qaýipsizdik qyzmeti mamandarynyń usynǵan málimetine súıensek, osy taqylettes oqıǵalar­dyń tirkelýi sońǵy jyldary jıilegen. Olardyń bárin tizip shyǵý shart emes shyǵar. Biraq, el ishinde ersi qylyǵymen erekshelengisi keletin nemese ózge ıdeologııanyń jeteginde ketip, jurtty jazym etýge beıil bas­buzarlardy baıqasańyz, jedel jeli arqyly habarlaýǵa bolady. Sondaı-aq, kóńilińizge kúdik uıalaǵan jaǵdaıda nemese qandaı da bir teris kózqaras­taǵy túsiniktiń aq-qarasyn ajyratý­ǵa qatysty saýal alańdatsa, táýlik boıy qyzmet kórsetetin «110» nómiri­ne qońyraý soǵyp, keńes alýyńyzǵa da bolady.