Baýkeńniń: «Otan úshin otqa tússeń, kúımeısiń» degen ulaǵatty sózi oıǵa oralady. Bul árbir qazaqstandyqtyń basshylyqqa alar ustanymy bolsa degim keledi. Patrıot bolý degenimiz –qur sóz emes, ol – Otandy júrekpen súıe bilý.
Árıne, otansúıgishtik qasıet adam boıyna babalardyń qaldyryp ketken ósıetimen jáne asqaq rýhymen sińedi desek, ol úshin, aldymen, tól tarıhymyz ben ana tilimizdi kózdiń qarashyǵyndaı saqtaı bilýimiz kerek. Bizdiń babalarymyz el men jer úshin janyn qıyp, qanyn tókken. Qazaqta «bilektiń kúshimen, naızanyń ushymen» degen sóz tirkesiniń qalyptasýy sol batyr babalarymyzdyń qaıtpas ómirlik ustanymyn pash etedi. Qansha batyr bolsa da, ár adam ómir súrgisi keletini aqıqat. Al Otan úshin jan berýge babalarymyz qashan da daıyn boldy. Endi osy erlik dástúrdi jastarymyzdyń boıyna qalaı sińiremiz degen oı mazalaıdy.
Myna bizder óskeleń urpaqqa órkendegen eldi tabystap ketý úshin qolymyzdan kelgenshe áreket etýdemiz. Tek eldiń ǵana emes, myna álemniń taǵdyryna alańdap, sol baǵytta elimiz kóptegen shara ótkizip keledi. Máselen, jaqynda ıadrolyq qarýdyń aldyn alýǵa qatysty elimizde úlken halyqaralyq shara oryn aldy. Memleket basshysy Nursultan Nazarbaevtyń Semeı polıgonyn jabý arqyly ózgelerdiń de osyndaı ıgi qadamdarǵa barýyna túrtki bolýy Elbasymyzdyń búkil álemniń patrıoty ekendigin kórsetip berdi. Jahan Qazaqstandy osyndaı ońdy bastamalarymen jaqsy tanıtyn boldy. Keıbir ǵalymdar adamzatty joıýdyń joldaryn tapqany úshin nebir syı-sııapattar alyp jatsa, Elbasy, kerisinshe, beıbitshilikti saqtaýdy oılaǵan sanaýly tulǵalardyń qatarynda.
Mine, osyndaı beıbitsúıgish saıasat jastarymyzdyń da boıynan tabylyp, bolashaqqa degen senimimizdiń sabaqtastyǵyna jol salady degen oıdamyn. Patrıottyq sezimdi jastardyń boıyna sińirýdi minberde turyp júzege asyrý múmkin emes. Sondyqtan árqashanda jastardyń janynan tabylyp, solarǵa durys baǵyt siltep otyrsaq, ol da otansúıgishtik qasıettiń kórinisi. Buryndary, mysaly, ákelerimiz bizderdi tizesine otyrǵyzyp alyp, ata-babalarymyzdyń erlikterin baıandap, eldi qalaısha... saqtap qalǵany jaıly aıtyp otyratyn. Bul – tárbıe. Eger aldaryńnan úlken kisiler ótse, joldaryn kespeńder, sálemdeskende eki qoldaryńdy berip amandasyńdar deýshi edi. Ásirese, qyz balalarǵa úlkenderdiń jolyn kespeńder dep aıtyp jatatyn. Munyń ózi de patrıottyq. Qazirgi kezde meshitterden úlkenderdi emes, jastardy kóp kóretin boldyq. Árıne, bul úrdis barlyǵymyzǵa oı salýy tıis.
Kóbinese jumyssyz júrgender, sabaqtan qashyp júrgender sol arany úıirsekteıdi. Olaı bolsa, otansúıgishtikti dinmen birge jaqsy qasıettermen tárbıeleý bizdiń paryzymyz. Buryn ákelerimiz «áı balam, etiń otanǵa, súıegiń bizge» dep aıtýshy edi. Sol sózder áser etti me eken, barlyǵymyz da áskerge barýǵa yntyq boldyq. Qazir de kóp jas áskerge barǵysy-aq keledi. Olar da áskerı sapqa turyp, Otan aldynda ant bergisi keledi. Qazirgi zaman talabyna saı, úlken áskerdiń qajeti joq dep jatyrmyz. Onyń ornyna kásibı ári zamanaýı qarý-jaraqtarmen qarýlanǵan utqyr da jedel qımyldaıtyn ásker jasaqtaýdamyz. Meniń paıymymsha, jastardy burynǵydaı ásker sabyna shaqyryp, mindetti túrde aeroutqyr kúshteri quramyna almasaq ta, ár túrli mamandyqtarda shyńdasaq.
Eń aldymen, jastarymyz Otan aldynda ant qabyldap, óz jaýapkershiligin jaqsy seziner edi. Ekinshiden, olar ózine qajetti mamandyqtardy ıgerip shyǵady. О́kinishke qaraı, elimizde júrgizilip jatqan kóptegen qurylysta sheteldik jumysshylar eńbek etip jatsa, qazaq jastary mamandyǵynyń bolmaýyna baılanysty shetqaqpaı bolyp jatqan jaıy bar. Qoryta aıtqanda, elimizdiń tynyshtyǵyn saqtaý, órkendeýine qolushyn berý tek Elbasymyzdyń mindeti emes, ol barshamyzdyń jumyla kirisýimizdiń nátıjesi bolatyny anyq. Daýly jerde bereke bolmaıtynyn eskersek, bir-birimizge qoldaý bildirý arqyly ǵana bolashaǵymyzdy jarqyn ete alamyz. О́tkenimiz ben bolashaǵymyzdy jalǵaıtyn ıgi ister árqaısymyzdyń boıymyzdan tabylyp jatsa, ony Otanymyzdyń ósip-órkendeýine az bolsa da qosqan úlesimiz dep bilemin.
Baqytjan ERTAEV, Májilis depýtaty