Jeksenbi kúni alystaǵy Aıyrtaý bókterinde jatqan Januzaq aýylynyń turǵyndaryn qýantqan oqıǵaǵa kýá boldyq. Alaqandaı aýylda Parlament Májilisiniń depýtaty Berik Dúısembınovtiń tikeleı jetekshiligimen salynǵan jasandy fýtbol alańy saltanatty túrde paıdalanýǵa berildi. Aıta ketý kerek, jańa nysan «Aq jol» demokratııalyq partııasynyń parlamenttik fraksııasynyń qoldaýymen salyndy.
Munda sport alańyna arnalǵan barlyq tehnıkalyq talap eskerilgen. «Aqjoldyq» depýtattardyń qarjysyna turǵyzylǵan zamanaýı nysannyń kólemi 50/25 metrge teń. Jasandy gazonmen jabylǵan jasyl alańda asyr salǵan aýyl búldirshinderiniń qýanyshynda shek joq. Biz barǵanda jańa keshende aýyl komandalary arasynda fýtboldan týrnır ótip jatyr eken.
– Sportshylarymyz Olımpıada oıyndary men álemdik jarystarda úzdik nátıjeler kórsetip júr. Sport – elimizdiń mártebesi, jastarymyzǵa úlgi. Sondyqtan, Memleket basshysy Nursultan Nazarbaev aıtqandaı, ár qazaqstandyq salamatty ómir saltyn ustanyp, sportpen shuǵyldanýy tıis. Degenmen, buqaralyq sport túrleriniń ózi qarapaıym turǵyndarǵa qoljetimdi bola bermeıdi. Sondyqtan bul fýtbol alańy – bizdiń aýyl balalary men jasóspirimder sportyn damytýǵa qosqan úlesimiz bolmaq, – dedi Berik Dúısembınov.
Atalǵan sharaǵa Májilis depýtattary Azat Perýashev, Keńes Absatırov pen Bolat О́tepbaev, Arman Sqabyluly, Rahat Altaı syndy partııa músheleri jáne aýdan jurtshylyǵy qatysty.
Dýman ANASh,
«Egemen Qazaqstan»
Shyǵys Qazaqstan oblysy,
Ulan aýdany